Kigali

Kigali

Localización
1°57′13″S 30°03′38″L / -1.9536, 30.0606
Estado	Ruanda
Província (pt)	Kigali Province (en)
Capital de	Ruanda Kigali Province (en)
Poboación
Poboación	1.156.663 (2019) (1.584,47 hab./km²)
Xeografía
Superficie	730 km²
Bañado por	Ruganwa (en)
Altitude	1.567 m
Creación	1907
Organización política
• Xefe do goberno	Pudence Rubingisa (pt) (2019–2023)
Identificador descritivo
Fuso horario	UTC+02:00
ISO 3166-2	RW-01
Outro
Irmandado con	Kampala Roma Waremme (pt) Chengdu Shenzhen Lusaca Jinan Pretoria Durban San Bernardino Maguncia (2007–) Oklahoma City (2011–)
Páxina web	kigalicity.gov.rw

Kigali é a capital e a cidade máis poboada da república africana de Ruanda. Ademais constitúe unha provincia coa súa propia estrutura administrativa. Está situada no centro do país, do que é o núcleo cultural e económico. A súa poboación, consonte estimacións do ano 2005, calculábase que superaba os 850.000 habitantes.

Todos os despachos oficiais estatais, incluída a sede da presidencia e do Goberno e máis todos os Ministerios teñen a súa residencia na cidade. Ademais a cidade de Kigali constitúe de seu unha provincia.

Fundada no 1907 durante o dominio colonial alemán, a cidade só atinxiu o grao de capital de Ruanda con ocasión da independencia do país, obtida en 1962. Nos tempos do reino mwami a capital estaba localizada en Nyanza, en tanto na época colonial tiña a súa sede en Butare, localidade hoxe denominada Astrida. Na época da independencia de Ruanda, pensouse nun primeiro momento en escoller de novo Butare como capital, mais tamén en Kigali, que tiña a vantaxe de se atopar xeograficamente no centro do país: desde aquela a cidade acabou por tornarse o principal centro de Ruanda e acabou por ser a capital de facto.

A partir do 7 de abril de 1994, Kigali foi un dos escenarios do terríbel xenocidio causado pola rivalidade secular entre Hutu e Tutsi, na que terminaron mortos centos de miles de persoas. Logo da guerra civil comezou unha reorganización da cidade dentro do proxecto de pacificación do país.

Kigali áchase nun altiplano cheo de outeiros con alturas variábeis de entre 1.433 e 1.645 metros. Os edificios administrativos adoitan situarse nas abas e cimas, en tanto as edificacións de vivendas acostuman localizarse nos vales. O pico máis alto da cidade é o monte Kigali, con 1850 m.s.n.m.. As coordenadas da cidade son 1º 56' 38" S e 30º 03' 34" L.

Pola súa situación o clima que lle correspondería debería ser ecuatorial, porén está suavizado pola altura e máis pola influencia do monzón que procede do leste, do océano Índico. As precipitacións medias non chegan aos 1.000 mm, distribuíndose as chuvias durante unha longa estación chuviosa que se estende entre setembro e maio. A temperatura media anual é de algo máis de 20 °C.

Nas proximidades da cidade extráese estaño e tungsteno. Como a economía ruandesa está a atravesar unha época de medra, na cidade estanse a levantar novos e numerosos edificios. Con todo no territorio urbano, e a consecuencia da guerra civil pasada están presentes moitas ONG.

Kigali posúe un aeroporto internacional, con voos diarios até Nairobi, e menos frecuentes para Addis Abeba e Xohanesburgo. Semanalmente hai un voo para Ámsterdam. Dentro do país só hai comunicación aérea con Cyangugu, no extremo suroeste.

• 
  O monte Kigali
• 
  Vista dunha praza
• 
  Unha rúa
• 
  Un minibús en Kigali

Commons ten máis contidos multimedia sobre:  Kigali

• Páxina oficial de Kigali