免費報紙

免費報紙係唔使畀錢可以睇到嘅報紙，通常嚮市內嘅車站、地鐵站同埋人流多嘅地方免費派發。免費報紙嘅收入來源主要係依賴廣告或者贊助人。

依靠廣告收入生存嘅免費報紙，通常新聞內容少，而廣告多，因為白報紙成本貴，所以越多新聞轉載，報館開支越大。出紙越多，浪費越多，唔合利潤最大化商業原則。

嚮飛機機艙或者貴賓候機室，實有免費報紙同免費雜誌。另外唔少豪宅屋苑同服務式住宅，住戶成日收到非賣品嘅報紙，其中唔少係出面要畀錢先買到嘅收費報紙，包括《紐約時報》、《華盛頓郵報》、《大公報》、《文匯報》、《海峽時報》咁。

世上係冇免費午餐嘅，免費報紙之所以唔使錢，係因為有人事先代替讀者畀咗錢。啲個人可能係廣告商、出版人或者贊助人。

香港

《都市日報》係香港近年第一份免費報紙，响2002年4月15號創刊，其後《頭條日報》、《am730》、《英文虎報》、《大紀元時報》、《晴報》、《爽報》都加入咗免費報紙市場。不過《爽報》响2013年停刊，响免費報大潮入面淘汰。《晴報》於2023年9月15日發行最後一份印刷版報章。