Mimnermu

Mimnermu ('n grecu anticu Μίμνερμος , Mímnermos; Culufoni o Smirni, VII sèculu a.C. – prima mitati di lu VI sèculu a.C.) fu nu pueta eliggìacu e cantori grecu.

Ppi quanta rivarda li sò òpiri, hannu junciutu nzinu a nuatri na vintina di sò frammenti, ca fùrmanu 'n tutali 80 versi. Fu auturi di assai eliggìi amurusi, spartuti di li filòluggi alissandrini ntî dui libbra.

• Nannò: cugghiuta di puisìi addidicata a na flautista (na fìmmina ribelli, 'n cunfrontu a lu standard grecu). Fu lu primu auturi a didicari nu libru a na fìmmina.
• Smirnèidi: puimuzzu èpicu ca cunta la verra contru Smirni.

Li cuntinuti ca Mimnermu prifirisci, a lu cantu di lu mitu e l'epos, sunnu pigghiati di nu pissimìsimu, ca si spiega ntî la brivitati di la vita, ntî la nichizza di lu campari, ntî lu finiri di la carusanza e ntî l'avvicinàrisi di la vicchiània.