Севилья

Город в Испании Севилья Sevilla исп. Застава Герб Держава ИспанияИспания Область Андалузия Провинция Севилья Координаты 37.377222, -5.98694437°22′38″ с. ш. 5°59′13″ з. д. / 37.377222° с. ш. 5.986944° з. д. (G) (O) (Я) Розлога 140 км² Надморска вышка 7 м Обывательство 704 198 особ (2010) Часова зона UTC+1, влѣтѣ UTC+2 Телефонный код +34 95 Поштовый индекс 410ХХ Официалный сайт [1] исп. Севилья Севилья на Викискладѣ

Севилья, исп. Sevilla — город на югу Испании, четвертый подля числа обывательства, вызнамный финанчный, културный и умѣлецкый центер, главный город провинции Севилья и автономной области Андалузия.

Пристав Севилья, положеный на рѣцѣ Гвадалквивир около 80 км од Атлантичного океана, е единым в Испании рѣчным приставом, котрый принимать шифы морской плавбы.

"NO8DO" — официалне гесло Севильи, котре е на муниципалной заставѣ. Тото свого рода ребус, котрый по испанскы роскрывать ся в "No me ha dejado" чит.: но ма дехáдо "Она (Севилья) мня не лишила". Подля легенды тото гесло даровав городу краль Алфонсо Х. за то, же мав подтримку од обывательох в тяжком моментѣ истории. В серединѣ ребуса е madeja чит.: мадéха — прядено вовны.

Подля легенды Севилью основав Геркул, тотожненый з феницийскым богом Мелкартом, котрый перейшов через Гибралтарскый пролив и заклав торговы мѣста, де теперь находять ся Севилья и Кадис.^[1] Археологичны роскопы односять найстаршу часть города ку 8. ст. до н. е. Феничане закладену ту колонию назвали Сефела («низина, ровнина»), Грекы тоту назву трансформовали на Испола, Римляне на Гисполис, арабска форма была Ишбилья, близка до днешной.^[2] В порѣчу Гвадалквивира жили в той добѣ иберийскы племена Тартешанох, котры мали свою изоловану културу и писмо, указуюче на вплыв Фениции и Египта.

Од року 206 до н. е. зоставать Севилья добыта Римлянами. В роках 712–1248 была в руках Маврох. В той добѣ ставать ся вызнамным центром торговлѣ и ремесел. 22. новембра 1248 Севилья была добыта испанскым войском, прилучена ку Кральовству Кастилия-Леон^[3] и одтогды доднесь зоставать в испанской юрисдикции.

В 15-17. ст. Севилья была найвекшым в Европѣ торговым городом. За рокы 1504–1650 з того пристава одплыли 17 760 морскых лоди.^[4]

З гавани Палос в приставѣ Севилья в року 1492 рушила перва експедиция Криштофа Колумба.^[5] В року 1519 з Севильи одплыв у путь доокола свѣту Фернандо Магеллан.

Севилья мать розвите машинарство, ливарство, продукцию стрѣлива, велику доганову фабрику, выраблять порцелан, чоколаду, мыло, корковы заткы,^[3] текстиль, продукты хемии и нафтохемии, склярства и папѣрництва.^[5]

Севилья мать едну з найстаршых универзит (1502). В року 1981 в Севильи отворив ся меджинародный аеропорт.^[5]

Взглядом на богату историю Севилья мать уникатну архитектуру, велике число културных и историчных памяток.^[3]

• Révai nagy lexikona. 1-21. köt. Révai Testvérek Irodalmi Intézet Részvénytársaság, Budapest. 1911–1935. Том 16, сс.775-776.
• УСЭС: Украинский советский энциклопедический словарь в трех томах. / Кудрицкий А.В. и др. (ред.). Главная редакция Украинской Советской Энциклопедии им. М.П. Бажана. К., 1988. Том 3, с. 157.
• Севилья на сайтѣ Туризм в Испании англ.
• Официалный сайт городской .администрации исп.
• Leyendas de Sevilla – 5 Hércules y la fundación de Sevilla исп.

Тоты даны суть часточно або цалком основаны на перекладї статї Seville на анґліцькій Вікіпедії.