Saint Sébastchien

Ch't' articl'ye est liée doubl'ye : vaie Sébastchien (frouque). 

Saint Sébastchien est un saint tch'a 'té mouontré dans bein d'portraits avaû l's années car chenna donnait l'opporteunité ès artistes dé peindre un houmme d'sabilyi dans un sujet Chrêtchien.

Lé saint a 'té populaithe dans l'art ouaithe qué s'n histouaithe né sait dgéthe connue. I' fut martythé et entèrré par lé C'mîn Appien à Rome. Ch'est en tchi eune histouaithe avait 'té înventée ou empruntée pus tard, et nou dit qu'Sébastchien 'tait un offici du corps d'garde. Quand nou dêcouvrit qu'i' 'tait un Chrêtchien, i' fut tithé atout d's èrchelles. Mais i' n'mouothit pon et i' fut souongni par eune sainte (ou deux-trais). Quand i' fut dgéthi, l'empéreu l'èrcondamnit.

Les peintres dé la R'naîssance èrtrouvit un întéthêt dans l'anatonmie et r'chèrchit un mouoyen d'faithe sèrvi chein qu'il' avaient apprîns dans lus travas pouor l'églyise.

La Saint Sébastchien est mèrtchie l'20 d'Janvyi par les Catholiques et l'18 dé Dézembre par les Grècs Orthodoxes.