Wohre Jesuskark

De Wohre Jesuskark is en chineesche Freekark, de 1917 in China grünnt wurr. As Vörsitter hett de internatschonale Kark (de TJC International Assembly) den Prediger Yung-Ji Lin wählt. Opstunns hett de Kark zwischen 1,5 un 2,5 Millionen Liddmaten in 45 Länner op allen Kontinenten. De Kark is en chineesch Affleger vun de Pingstkarken de to den Anfang vun dat 20. Johrhunnert opkamen sünd. As Teel hett sik de Kark sett, allen Natschonen dat Evangelium to bringen, ehr dat Jesus wedderkümmt.

De teihn Grundlehren vun de Wohre Jesuskark sünd:

1. „Jesus Christus is dat Woort dat Fleesch worrn is. He is an’t Krüüz doodbleven, dat de Sünners vergeven warrt. He is wedder opstahn an’n drüdden Dag un opstegen in’n Himmel. He is de ene, de de Minschenheit free maakt, de Schöpper vun Himmel un Eer un de ene Wohre Gott.“
2. „De hillige Bibel, dat Ole un dat Ne’e Testament, ut Gott sien Geist spiest, is de ene opschrevene Wohrheit un dat Maat för dat christliche Leven“
3. „De Wohre Jesuskark, de vun uns Herrn Jesus Christus dör den Hilligen Geist in de Tiet vun den 'laten Regen' grünnt worr, is de wedder opricht Wohre Kark ut de Tiet vun de Apostels.“
4. „De Dööp in Water is dat Sakrament, dat de Sünnen vergifft un nieg maakt. De Dööp mutt in natüürlich 'leven' Water passeren, so as in en Stroom, See oder Born. De Döper, de sülvst al in Water döfft is un den Hilligen Geist kregen hett, döfft in den Naam vun den Herrn Jesus Christus. Keen döfft warrt, mutt kumplett ünner Water dükert warrn, mit den Kopp baven un dat Gesicht ünnen.“
5. „Dat wi den Hilligen Geist annahmen hebbt, wat sik in dat Tungensnacken apenboort, is Gewähr dorför, dat wi dat Himmelriek arvt.“
6. „Dat Sakrament vun de Footwaschen maakt da mööglich an den Herrn Jesus Andeel to hebben. Dat helpt ok, jümmers doran to denken, dat een Leev, Hilligkeit, Demut, Vergeven un Deenst hebben schall. Jedeen, de in Water döfft is, mutt sik sien Fööt in den Naam vun Jesus Christus waschen laten. Eenanner de Fööt to waschen kann jümmers dann daan worrn, wenn dat anbröcht is.“
7. „Dat hillige Abendmahl is dat Sakrament, wat an den Dood vun den Herrn Jesus Christus denken hölpt. Dat maakt uns dat mööglich, an dat Fleesch un Blood vun uns Herrn Deel to hebben un mit em Gemeenschop to hebben, so dat wi ewig Leven hebben köönt un an den letzten Dag opweckt warrt. Dit Sakrament schall so faken afholln warrn as mööglich. Bloots Brood, dat ahn Gest maakt is un Druvensaft kann bruukt warrn.“
8. „De Sabbatdag, de sövente Dag vun de Week (Sünnavend), is en hilligen Dag, vun Gott segent un hillig maakt. He schall dör den Herrn sien Gnaad för dat Andenken an Gott sien Schöppen un sien Retten verbröcht warrn un in Hapen op de ewige Roh in dat tokünftige Leven.“
9. „Dat Freesien warrt uns dör Gott sien Gnaad un dör den Glöven schenkt. De, de glöövt, mööt sik op den Hilligen Geist verlaten, dat se na en hillig Leven streevt, Gott acht un de Minschheit leev hebbt.“
10. „Christus warrt an’n Jüngsten Dag wedderkamen, wenn He vun’n Himmel daalstiggt, de Welt to richten: De Gerechten warrt dat ewige Leven tokriegen, wieldes de Bösen op ewig verdammt warrt.“

Wohre Jesuskark (Ingelsch)