Schregenmoor

Wapen/Flagg	Koort
Basisdaten
Bundsland: Neddersassen Landkreis: Stood Samtgemeen: Olendörp-Himmelpoorten Gemeen: Düünbeudel
Inwahners:
Postleettall:	21709
Vörwahl:	04141
Geograafsche Laag:	Koordinaten:53° 36′ N, 9° 23′ O53° 36′ N, 9° 23′ O

Schregenmoor (hoochdüütsch Grefenmoor) is en lütten Oort in de Gemeen Düünbeudel in’n Landkreis Stood, Neddersassen.

De Oort liggt op de Stoder Geest in en Rebeed mit veel Moor. Dat Water ut dat Rebeed flütt in’n Oosten över den Oosterbeek na de Haschenfleter Wettern af.

De Naveröörd sünd Middelsdörp in’n Noordwesten, Middelsdörp-Siedlung in’n Noorden, Haddörp in’n Noordoosten, Wiepenkathen in’n Süüdoosten, Wittenmoor in’n Süden un Düünbeudel in’n Westen.

Schregenmoor weer fröher bloot en enkelten Hoff un hett al jümmer to de Gemeen Düünbeudel höört. Ok vondaag sünd dat bloot en poor Hüüs. De Oort hett mit de Amanda en ole Galeriehollanner-Windmöhl, de 1896 boot worrn is, un dor blangen dat Landgasthuus an de B 73. Vörher harr hier al en Möhl stahn, de 1853 boot worrn, aver 1874 un 1896 afbrennt is.

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Hammoh in’n Kanton Himmelpoorten höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Himmelpoorten in’n Kanton Himmelpoorten.

Vör 1885 weer dat Dörp Deel von de Böörd Olendörp binnen dat Amt Himmelpoorten. 1885 is de Oort denn Deel von’n Kreis Stood worrn un 1932 von’n ne’en un grötteren Kreis Stood.

Schregenmoor is evangeelsch-luthersch präägt un höört to dat Kaspel von de Marienkark in Himmelpoorten. Bet 1895 weer de Oort Deel von dat Kaspel Olendörp, is denn aver na Himmelpoorten wesselt, dat dichter bi weer.

För de Kathoolschen is de Hillig-Geist-Kark in Stood tostännig.

De Möhlen- un Heimaatvereen Düünbeudel-Schregenmoor is 1993 grünnt worrn.

För Schregenmoor is de freewillige Füürwehr Düünbeudel mit tostännig.

Schregenmoor liggt an de Bundsstraat 73 un is över disse Straat mit Stood un Düünbeudel verbunnen. Lüttjere Straten gaht na Middelsdörp-Siedlung un Wittenmoor.

De nächste Autobahn is de Autobahn 26 (Afsnidd Stood–Hamborg). De Opfohrt 2 Stood-Süüd liggt so negen Kilometer in’n Oosten von Schregenmoor an de B 73.

De nächste Bahnhoff is so bi dree Kilometer wied weg in’n Noordwesten de Bahnhoff Hammoh an de Nedderelvbahn von Cuxhoben na Hamborg.

1. ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 87
2. ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 222
3. ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 135
4. ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 142
5. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 150
6. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 159

• De Windmöhl bi de Neddersassische Möhlenstraat (hoochdüütsch)
• Landhotel Schregenmoor (hoochdüütsch)