Pitagora

Pitàgora (in grego antico: Πυϑαγόρας, Puthagòras; in latin: Pythagŏras) o l'é stæto un matematico e filosofo do VI sécolo a.C.

Figgio de Mnesarco, o l'é nasciûo a Samo inta primma meitæ do VI sec. a.C. Apollodoo o colloca a so acme' into 532-531 a C. O fu scolao de Fereçide e de Anascimandro. Un dæto de rilevo o l'è o so trasfeimento da-a Greçia inte l'Italia meridionâ (foscia in gio a-o 529 a.C.) dove o fondò, a Croton, una celebre scœua filosofica - ch'a l'è consciderâ fonte e origine da coscì díta «filosofia italica» - inte forme de una comunitæ religiosa con intenti de rigeneraçion morâ e politica. A dotriña ch'a caratterizza, ciu comunemente, a filosofia pitagorica a l'è quella ch'a conscidera o numero comme essença de tutte e cose, in quante ogni aspetto do reâ o vegniva ricondúto a una reçiproca relaçion ò armonia de quantitæ numerabile (modello pe eccellença ea ritegnuo a concordança di soin, a synphonia, realizzâ inta muxica a traverso di intervalli matematichi). Tutti i numeri, pe i Pitagorichi, ean suddivixi inte doe classe, di pâ e di despa (una terça a l'ea quella do pa-despa, individuâ inte l'un-monade).

A tradiçion che o riguarda a l'è coscì collegâ con quella concernente o pitagorismo posteriô che l'è assæ diffiçile isoâ, in lê, i dæti che se pœuan consciderâ comme di costituenti aotentichi da fixonomia do pensatô ionico. Circa a personalitæ de Pitagora l'è tuttavia poscibile ricavâ de indicaçioin segue da quarche mençun de scritô antigo, ò so contemporannio ò de poco posteriô (Senofane, Eraclio, Erodoto): cosa ch'a l'escludde o sospetto che a so figua a posse desciorvise inte quella de un eroe eponimo da comunitæ pitagorica e a rende poscibile consciderâ a tradiçion conçernente a so vitta comme presupponente un effettivo nucleo storico. Segondo a tradiçion, Pitagora, figgio de Mnesarco, o nascette a Samo inta primma meitæ do sec. 6º a.C. Scolao de Fereçide e de Anascimandro, o se recò in Egitto pe inprendighe a sapiença de quelli sacerdoti. Tornao a Samo e trovao a so patria sotta o governo do tiranno Policrate, o se trasferì inta colonia de Croton inta Magna Grecia e o ghe fondò a so comunitæ.

A Pitagora e a-a so scœua se deve a distinçion tra logistega e aritmetica, saiv'a dî tra e regole pratiche de calcolo in sce-i numeri (intreghi) e a sciença di numeri. Pitagora quindi «o l'elevò l'aritmetica a-o de d'ato di bezœugni di mercanti» (Aristosseno). Pâ seguo che a Pitagora e a-i pitagoreghi segge da attribuî: a distinçion di numeri in pâ e despa; a definiçion di numeri amicabili e di numeri perfetti; a rappresentaçion geometrica di numeri intreghi mediante di gruppi de ponti disposti in moddo da formâ de figue geometriche regolæ, ch'a permisse a-i pitagorichi de conseguî di risurtæ importanti relativi a-i quadrati perfetti, a-a somma di termini de una progrescion aritmetica, ecc.

Quante a-a geometria, ôtr'a-o famoso teorema de Pitagora, a-a scœua pitagorica l'è attribuio: 1) o teorema segondo o quæ a somma di angoli interni de un triangolo a l'è inguâ a doi angoli retti; 2) a risoluçion geometrica di equaçioin de 2º grao; 3) i primmi elementi da teoria de proporçioin e da scimilitudine; 4) a scoverta di incommensurabili; 5) a costruçion di «corpi cosmichi», saiv'a dî di çinque poliedri regolæ, ò aomanco de quarchedun de questi.

Ma a Pitagora e a-i primmi pitagorichi dev'êse attribuia ascì, e sorvetutto, a fondaçion da geometria raçionâ. O dexideio de dâ una giustificaçion rigorosa e generâ, no empirica ni limitâ a pochi caxi, do teorema de Pitagora, o portò Pitagora e i so allevi a ordenâ a geometria inte de cadeñe de deduçioin che, partindo da de veitæ sence e evidente, condussan de man in man a-a scoverta de de proprietæ sempre ciu riposte.

Un di primmi teoremi da geometria clascica, segondo o quæ o quæo costruio in sce l'ipotenusa de un triangolo rettangolo o l'è equivalente a-a somma di quæi costruii in sce-i cateti; o g'ha nomiose generalizzaçioin (teorema de Pitagora generalizzao, n-dimenscionâ, ecc.) e o l'è a-a base do concetto de distança inti spaçi eüclidei ò psœüdoeuclidei.

Di âtre teorie tipiche do pitagorismo son a reincarnaçion ò metempsicoxi, e a dotriña cosmologica. A metempsicoxi a l'ea a credença inta trasmigraçion di añime da un corpo a un âtro - de specie despæge ascì- doppo a dissoluçion. Se tratta de-uña de dotriñe de Pitagora ciu soventi reciammæ da-a lettiatua crestiaña; aoa pe accentuane e affinitæ co l'insegnamento crestian (corpo comme prexon, l'añima immortâ a sequæo inte questo ch'a l'aspeta a liberaçion verso una biatitudine de vitta incorpoia, inte un mondo ciu âto), aoa pe drammatizzane e differençe (negaçion de l'individualitæ de l'añima umaña, so inguança con quella di animæ bruti, vegetæ e mineræ, ecc.).

A dotriña cosmologica a consciderava a-o centro do cosmo o fœugo e in gio a lê, inte di orbite concentriche, i varri pianeti scin a-a sfea estremma, inglobante o tutto, formâ lê ascì de mateia ignea. Tra a Tæra e o fœugo centrâ gh'ea collocao l'antitæra (ἀντίχϑων), ch'a fava insemme a-a Tæra o gio do fœugo ogni 24 ôe. In tâ moddo l'antitæra a l'impediva che i raggi do fœugo razonzessan direttamente a Tæra e a risurtava invixibile da l'emisfeo abitao, perché questo, inta so rotaçion, o dava de longo verso l'esterno da sfea. I raggi do fœugo centrâ pervegnivan a l'emisfeo abitao solo percose riflesci da-o sô (ch'o ruava inte un'orbita ciu larga). Quande a tæra a se trovava da-a parte do sô s'aveiva o giorno, in caxo contraio a nœutte.

• Wikimedia Commons a contêgne di files in sce Pitagora