Bahrein

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Bahrein (offesjeel مملكة البحرين, keuninkriek Bahrein), is 'n Arabisch land op 'n eiland in de Perzische Golf. Hoofstad is Manama. Boete 't hoof-eiland besleit 't land nog e paar kleiner eilande, boe-oonder de Hawar-archipel. Bahrein is 'n echte oliestaot; wijer verdeent 't land aon exclusief toerisme en heet 't 'ne grandprix veur otocoureurs. 't Land oonderhèlt ing betrèkkinge mèt Kataar en in minder maote mèt Saoedi-Arabië.

Bahrein is sinds 2003 verdeild in vief gouverneursjappe.

• Manama
• Centraal Bahrein
• Muharraq
• Noord-Bahrein
• Zuud-Bahrein

In de ajdheid woort 't eiland, mèt zien strategische ligking, väöl gebruuk es veurpos, um Mesopotamië te kinne verdedege of Arabië aon te valle. De Babyloniërs, Assyriërs, Perze, Grieke en Arabiere naome 't achterein in bezit. Awwer naome zien Dilmoen (Akkadisch) en Tylos (Grieks). De Arabiere brachte d'n islam, en de naom Bahrein, dee twie zieë beteikent. De ein zie is de Perzische golf, de ander zie is 't zeut water oet de bojem.

In de Middeliewe verkrege de sjeike vaan Bahrein ouch bezittinge op de vaste wal, in 't modern Soedi-Arabië, totdat de Portugeze in 1521 't gebeed begóste te controlere. Bahrein bleef door de iewe ummer gans of haaf oonaofhenkelek, en in 1783 koam de Chalîfa-dynastie aon de mach. Vaanaof 1861 controleerde de Britte 't land, al woort 't gein kolonie. Zoe beüigde me Iraan te behierse. Dit land verklaorde in 1957 Bahrein einzijeg tot 'n eige provincie. In e referendum verworp de Bahreinse bevolking die claim evels. In 1971 vertrokke de Britte, wat Bahrein algaw tot 'n welvaorende oliestaot maakde. Vaan 1975 tot 2001 regeerde de sjeik 't land otocratisch; de parlemintair democratie woort heringeveurd nao veurtdorende relle in de jaore negeteg.