Cosador
.jpg)
Un cosador es un macina usada per cose stofa e otra materias con filos. Los ia es inventada en la Revolui Industrial prima per descrese la cuantia de cose par mano en companias de vestes. De la inventa de la cosador prima, jeneral videda como creada par Thomas Saint en 1790, la cosador ia boni sinifiante la produi en la industria de vestes.
Cosadores per usa a casa ia es desiniada afin un person pote cose vestes individua par usa un tipo solitar de punta a un ves. En un cosador moderna, la stofa lisa fasil en e estra la macina sin la nonconveni de agos e ditales e otra utiles usada en cose par mano. La macinas temprana ia propulsada par un manico jirada par mano, o par pedales; macinas eletrical ia es introduida plu tarda. Cosadores industrial, contrastada con la macinas de casa, es plu grande, plu rapida, e plu variada en grandia, custa, apare, e taxe..
Charles Fredrick Wiesenthal, un dotor de medica e inventor deutx ci labora en England e plu tarda en Baltimore, ia es donada la patenta brites prima per un aparato per aida la arte de cosa, en 1755. Sua crea ia es un ago con du puntos e un oio a un fini, con du "manos" mecanical a supra e a su, per move la ago, mima la moves de cose par mano.
En 1790, la inventor engles Thomas Saint ia inventa la prima desinia per un cosador, ma el no ia promove sufisinte sua inventa. Sua cosador ia usa la metodo de la punto cadenin, en cual la macina ia usa un filo singular per fa puntos simple en la stofa. Un alena ia perfora la stofa e un bara con un punto forcin ia trae la filo tra la perfora co lo ia es oncida a su e traeda a la loca per la punto seguente, do la sicle ia es repeteda, securi la punto.
La cosador prima pratical e usada vasta ia es inventada par Barthélemy Thimonnier, un talior franses, en 1829. Sua macina ia cose reta usante la punto cadenan como lo de Saint.
La cosador american prima con un punto secur ia es inventada par Walter Hunt en 1832. Sua macina ia usa un ago con la oio e la punto a la mesma fini per porta la filo alta, un un naveta cadente per porta la filo basa. La ago curvida ia move tra la stofa orizonal, cual resta la anelo cuando lo retrae. La naveta ia alora pasa tra la anelo, securinte la filo.
La cosador prima cual combina tota la elementos variosa de la dui sentenio presedente de inova ia es construida par la inventor engles John Fisher en 1844, un poca tan temprana ca macinas simil construida par Elias Howe en 1844 e Isaac Merritt Singer en 1851. Car la arcivo de la patenta par Fisher ia es malfa, la reconose e beneficas ia pasa a Singer.
La pedal, usada de la eda medieval, usada per converti move resiproca a move jirante, ia es ajustada per move la cosador, cual resta libre ambos manos. La macinas eletrical prima ia es developada par la Singer Sewing Company, e introduida en 1889. Per la fini de la Gera Mundal 1, Singer ia pote ofre cosadores cual ia opera par mano, par pedal, e par eletrica.
Ante cosadores ia es inventada, femes ia spende multe de sua tempo en manteni la vestes de sua familia. Femes de casa de la clase media, an si la aida de un cosor empleada, ia spende alga dias cada mense en esta taxe. Un cosor esperta ia nesesa a min 14 oras per fabrica un camisa formal per un om; un roba per un fem ia usa 10 oras; e pantalones per la estate asta 3 oras. La plu persones estra la rica ia ave sola du completas: un per labora e un per soldi.
Cosadores ia redui la tempo per un camisa a un ora e 15 minutos, un roba a un ora, e pantalones a 38 minutos. Esta redui de labora ia resulta en un diminui de maneja de casa, cual permete plu otras per osio, recrea, e la capasia de xerca plu emplea estra la casa.
La usa industrial de cosadores redui plu la carga poneda sur femes de casa, e move la produi de vestes de la casa e de cosores a fabricas grande. Esta ia resulta en un crese grande de produi; min laborores ia pote produi la mesma cuantia de vestes, cual redui la custa de vestes sinifiante. Ultima, la industria de vestes, moda, e botecas ia repone emplea ultra lo de la pasada.