Atomium

La Atomium esas edifico en Bruxel, Belgia originale konstruktita por Expo 58, la Mondo-Ferio di 1958.  Desegnita dal injenioro André Waterkeyn ed arkitekti André e Jean Polak, olua alteso esas 102 m.  Olua non 18 metri-diametra stal-kovrita sferi esas konektita tale ke la edifico havas la formo di celulo de fero-kristalo, plugrandigita 165 miliard-foye.  Ol esas nun muzeo.

Tubi di diametro 3 m konektas la sferi alonge la 12 bordi dil kubo ed omna ok vertici a la centro.  Li inkluzas eskalero, eskalatori ed elevatoro (en la centrala, vertikala tubo) por permisar aceso a la kin habitebla sferi qui kontenas expozeyi ed altra publika spaci.  La supra sfero inkluzas restorerio kun panoramala vido di Bruxelles.  CNN nomizis ol la maxim bizara edifico en Europa.

En la 1950a yari, fido a ciencala progreso esis granda, e strukturo qua reprezentas atomi selektesis por enkorpigar lo.  La Atomium reprezentas non fer-atomi forme di uneso-celulo di fero-kristalo, plugrandigita 165 miliard-foye.

Malgre ke la Atomium reprezentas fero-celulo, la buli originale kovresis per aluminio.  Pos la rinovigi di 2004-2007, tamen, la aluminio remplasesis per stalo.  Pluse, dum ke la temo dil Atomium selektesis por reprezentar la entuziasmo dil Atom-epoko, fero ne uzesas e ne povas uzesar kom fuelo en nukleala reakti.

Rinovigo dil Atomium komencis en marto 2004; ol klozesis a la publiko en oktobro, e restis klozita til 18ma februaro 2007.  La rinovigi inkluzis remplasigar la aluminia folii sur la sferi per stalo.  Por helpar pagar la rinovigi, la olda aluminio vendesis a la publiko kom suveniri.  Triangulala peco di longeso cirkume 2 metri vendesis po €1.000.