Oslo

Oslo mainitase ezmäižen kerdan Sturlusonan Storrin islandižes skal'das. Om kirjutadud siš, miše Haral'd III-kunigaz pani lidnan alust vl 1048. Nimituz znamoičeb «Lo-jogensu». Lidn oli olmas mugoiženke nimenke vhesai 1624, konz sur' lämoipalo pani lidnad mantazole. Sid' vhesai 1925 sen nimi oli Hristianii (norv.: Christiania) da Kristianii (norv.: Kristiania).

Oslo šingotase merikompanijoiden keskuseks (Det Norske Veritas, registrirui mail'man laivišton kudendest), valdkundan kaikiš järedambal meriportal jüguiden i passažiroiden täht, laivansauvomižel da kohendusel, turizmal, tedoiduzinstitutoil energijan sferas. Kivivoin da gazan samižen kompanijoiden palakundad oma lidnas. Telekommunikacijoiden Telenor-kompanijan päfater sijadase lähižes ezilidnas.

Olso seižub ühtennimižen fjordan randal 23 m ü.m.t. keskmäižel korktusel, sijadase sen kaikiš pohjoižembas palas, Piterinke ühtel levedusel, no 20° päivlaskmaižemb. Om nell'kümne sart da 343 reskveden järved lidnan röunoiš.

Klimat om ven valdmeren valatoitusenke. Tal'v om pit'k pehmed lumekaz, räk kezal oleskeleb ei joga vodel. Voden keskmäine lämuz om +6,9 C°, kezakun-elokun +15..+18 C°, tal'vkun-uhokun −1,5..−2,3 C°. Ekstremumad oma −26 C° i +35 C°. Kezaaigan minimum om +0,7 C°, tal'vaigan maksimum om +13,8 C°. Paneb sadegid 824 mm vodes, enamba kezakus-kül'mkus (79..102 mm kus), vähemba uhokus-sulakus (40..47 mm kus).

Lidn jagase 15 nimitadud i nomeruidud administrativižeks rajonaks (norv.: bydel). Mugažo 19. voz'sadalpäi lidn jagase päivlaskmaižikš (Vestkanten) da päivnouzmaižikš (Ostkanten) polikš.

Edeline lidnan pämez' (norv.: Oslos ordfører) om Marianne Borgen (reduku 2015 — reduku 2023).

Vl 2018 lidnan eläjiden lugu oli 673,469 ristitud. Kaikiš suremb lidnan ristitišt om nügüd'. Läz pol'tošt millionad eläjid om kaikes lidnaglomeracijas, valdkundan kaks' seičemendest.

Rahvahuden mödhe seičeme eläjad kümnespäi oma norvegijalaižed (läz 432 tuhad ristituid vl 2022, oli 409 tuhad eläjid vl 2002), toižed rahvahad ottas 30 % ristitištos. Heiden immigracijan eziauguižed mad oma Pakistan, Somali, Pol'šanma i Ročinma paksumba kaiked.

Religijan mödhe (2019) 48,7 % eläjid oma lüteranižen Norvegijan jumalankodikundan polenpidajad, religijatomad otiba 28,9 % lidnan ristitištos, islamanuskojad — 9,5 %, hristanuskondan toižed denominacijad — 8,4 %, suril'man gumanizman kundad (Norvegijan gumanistine associacii päpaloin) — 2,8 %, buddizm — 0,6 %, toižed uskojad (induizm, Bahai) — 1,1 %.

Avtobusad, tramvaid da metro oma kundaližeks transportaks, mugažo likutimvenehed oma tulmha ujuden lähiden saridennopäi. Metro (norv.: T-banen i Oslo) om olmas vspäi 1966, vl 2012 siš om 97 stancijad (16 — manaluižed), kuz' jonod, 85 km raudted.

Kaik om koume rahvahidenkeskešt lendimportad Oslon ümbrištos, päine niišpäi om civiline Oslo-lendimport^[1] (vai Gardermuen, OSL / ENGM, radab vspäi 1998, 28,5 mln passažiroid vl 2019) 48 km pohjoižhe lidnan keskusespäi. Tehtas reisid Evropan pälidnoihe, Ispanijan lebutahoiže, AÜV:oiden päivnouzmha, Persijan lahten maihe, Tailandha. Toižed lendimportad sijadasoiš edahamb völ.

Vl 1952 Oslo vastsi Tal'volimpiadan ühtnijoid.

1. ↑ Rahvahidenkeskeine Oslo-Gardermuen-lendimport avinor.no-saital. (norv.) (angl.)

• Oslo-kommunan tobmuden aluzkundoiden oficialine sait (oslo.kommune.no). (norv.) (angl.)