El Cairo

Anca se la zona la xera abità fin da i tempi de l’antico Egito, no ghe mai stà na sità ciamà el Cairo fin a l’arivo dei arabi. El Cairo vol dir la soprafatrice, nome dato da i fatimidi a la sità che i ga fondà pena fora dal vilagio del Fustat. L’area ancò cuerta dal Cairo ciapa rentro varie sità antiche. A sud de la sità se cata le roine de Menfi, antica capitale faraonica vecia almanco 5000 ani. La vecia Cairo (nome odierno) la xe costruia so le roine de on vecio forte romano, che se ciamava Forte de Babilonia. La zona la xe diventà la prima abitada da i cristiani egizi e oncora ancò questa la xe la zona cristiana de la sità.

El Cairo ga conosù momenti de gloria e de rinasita econòmega, come anca guere e momenti de abandon. En tel 969 d.c., co l’arivo de la dinastia de fatimidi, el califo Ahmad ibn Tulun ga ordinà la costrusion de na citadela poco pi a nord de la vecia Cairo e l’acampamento del Askar e del vilagio de al Fustat. La sità fortificata la xe stà terminada co el pianeta marte (al Qahir) xera in asendensa. Alora el nome che ghe stà dato xera al madinat al qahira, la sità che sogioga, che soprafa.

En tel 1171, Saladino – vizir (ministro) fatimide de origine curda – ga fato costruir la Citadela, su la colina in fronte al Mukatam, la montagna che domina el Cairo. Dopo i faitimidi el xe rivà el tempo dei mameluchi.

En tel XIX secolo, Amin Pashà ga fato costruire grandi quartieri de ispirasion francexe. Dopo de lu, la grande ìzoła de la Gezira sul fiume Nilo la xe stà trasformada da zona agricola a ona de le zone pi bele de la sità.

El Cairo la xe finia soto el control de la Francia, prima, e del Regno Unio, dopo, fin a l’indipendensa.

Dopo l’indipendensa, i presidenti Saddat, Nasser e Osni Mubarak ga promoso vari projeti de svilupo. Ancò, el Cairo l’è na sità moderna, co infrastruture de prima clase.

El turismo el xe tra le prime industrie egiziane. A el Cairo ghe anca industrie de tuti i tipi: trasformasion alimentare, petrolifera, mecanica, tesile.

1. ↑ URL de refarensa: https://en.unesco.org/creative-cities/cairo. Data de consultasion: 9 de zugno del 2021.
2. ↑ URL de refarensa: https://www.ovpm.org/wp-content/uploads/2024/03/liste-villes-en-regle-pour-page-web12-03-2024.pdf. Data de consultasion: 31 de disenbre del 2023. URL del archìvio: https://web.archive.org/web/20240528143447/https://www.ovpm.org/members/cities/.

Portałi:
•   Portałe de Africa
|

•   Wikimedia Commons el detien imàjini o altri file so El Cairo
•   Scholia el detien schemi gràfeghi so El Cairo