Revolución de los Claveles

A entamos de la década de 1970, el réxime autoritariu del Estado Novo siguía pesando como una llosa sobre Portugal. En 1968, el so fundador, António de Oliveira Salazar, quedó torgáu por un accidente domésticu, que-y provocó un hematoma cerebral, polo que foi estremáu del gobiernu y finó en 1970. Sustituyólu Marcelo Caetano na direición del réxime. Cualquier intentu de reforma política foi albortáu por cuenta de la mesma inercia del réxime y al poder de la so policía política, la Polícia Internacional de Defensa del Estáu (PIDI).

A finales de la década de 1960 el réxime aisllábase, con líderes avieyaos y anquilosaos, nun mundu occidental en plena fervencia social ya intelectual. Mentanto, les colonies africanes de Mozambique y Angola, abasnaes polos movimientos de descolonización de la dómina, españaren en revueltes dende principios de la década y obligaben a la dictadura portuguesa a caltener pola fuercia de les armes l'imperiu colonial portugués, instaláu nel imaxinariu de los ideólogos del réxime como un "elementu de la identidá nacional" que tenía de caltenese de toes toes. El país viose empuestu a invertir grandes recursos humanos y materiales nuna guerra colonial de pacificación costosa y malo de sostener pa Portugal, actitú qu'oldeaba col restu de potencies coloniales d'Europa, que magar cuntar con más recursos que Portugal preferíen asegurase la salida del continente africanu de la forma más conveniente y menos costosa.

La guerra colonial xenerara conflictos ente la sociedá civil y l'élite militar. Tou esto mientres el modelu económicu defendíu pol réxime, basáu na autarquía y na esportación de materies primes, acompañáu por un débil desenvolvimientu industrial y un fuerte mercantilismu en tolos sectores de la economía, faía que Portugal permaneciera como'l país más probe de la Europa Occidental y xenerara una fuerte emigración, principalmente escontra Estaos Xuníos, Canadá, Francia, Venezuela y Alemaña Occidental.

En febreru de 1974, Caetano foi obligáu pola vieya guardia del réxime a destituyir al xeneral António de Spínola y a los sos sofitos cuando trataba de modificar el cursu de la política colonial portuguesa, que aportara a demasiáu costosa pal país. Ello ye que Spínola ganara fama ente los oficiales del exércitu opuestos al réxime cuando nesi mesmu mes publicó Portugal y o futuru, testu con casi 50 000 reproducciones,^[1] onde Spínola declaraba que'l país nun tenía de prosiguir la guerra colonial n'África sinón buscar una solución política» a esi conflictu.

Dende esi momentu en que se fixeron bultables les divisiones esistentes nel sen de la élite del réxime, un misteriosu Movimento das Forças Armaes (MFA) llevó alantre una revolución. El movimientu nació secretamente en 1973 de la combalechadura de dellos oficiales del exércitu, primero esmolecíos por cuestiones profesionales, pero que se politizaron pol empantanamiento de la guerra colonial.

A finales de 1973, el MFA algamó mayores niveles de crecedera y convirtióse nuna esmolición pa la policía secreta del Estado Novo, precisamente cuando gran parte de los sofitos d'Oliveira Salazar veníen de la élite militar, a la cual el salazarismo confiara un importante rol políticu por cuenta de la guerra colonial. El 16 de marzu de 1974, un grupu d'oficiales del MFA intentó un golpe d'Estáu sulevando un reximientu d'infantería na llocalidá de Caldas da Rainha col enfotu de colar sobre Lisboa. El llamáu Llevantamientu de les Caldas fracasó esi mesmu día y esti fechu motivó al réxime de Marcelo Caetano a llanzar una agresiva campaña d'espionaxe dientro del Exércitu, ordenando detenciones y tresllaos de guarniciones. Los xefes del MFA cavilgaron entós que precisaben recurrir a un golpe d'Estáu pa baltar al réxime, siendo invidable una salida pacífica. Pero p'afitar l'ésitu inmediatu y evitar una guerra civil, teníen d'ampliar el so círculu de contactos y, sobremanera, acelerar los planes de la revuelta cubriendo tolos detalles precisos pa nun avagar la reaición gubernamental.

La revolución empezó a les 22:55 hores del 24 d'abril, col conocíu cantar Y depois do Adeus de Paulo de Carvalho, que representara a Portugal nel Festival d'Eurovisión unos díes tras, tresmitida pol periodista João Paulo Diniz de la Rádio Emissores Associados de Lisboa, que yera'l primer avisu pa que les tropes prepararen los sos puestos y sincronizaren relós. A les 00:25 hores del 25 d'abril, la Rádio Renascença tresmitió «Grândola, Vila Morica», un cantar revolucionariu de José Afonso, prohibida pol réxime.^[1] Yera la segunda señal apautada pol MFA pa ocupar los puntos estratéxicos del país, pol aciu una serie de coordinaciones afitaes por un puestu de mandu establecíu pol mayor Otelo Saraiva de Carvalho nel cuartel de la Pontinha en Lisboa.

Nes hores siguientes, el réxime dictatorial derrumbóse. A partir de les 01:00 hores del 25 d'abril, les guarniciones de les principales ciudaes (Porto, Santarém, Faro, Braga, Viana do Castelo) decidieron siguir les órdenes del MFA, ocuparon aeropuertos y aeródromos, y tomaron les instalaciones del gobiernu civil. Ello ye que fora de Lisboa la situación escurrió con sorprendente aselu, y a lo llargo la'alborada les autoridaes del Estado Novo perdieron el control del país ensin resistencia.

Magar que dende les 03:00 hores asoleyarose continuos llamamientos radiofónicos de los capitanes d'abril» (los oficiales xefes del MFA) a la población, por que permaneciera nos sos llares, y a la policía, pa nun oponese a les xeres de les tropes,^[2] a l'amanecida d'esi mesmu día miles de civiles portugueses ganaron les cais en delles llocalidaes, entemeciéndose colos militares sulevaos. Nel intre de la madrugada, los militares rebalbos salieron de los sos cuarteles y ocuparon los aeropuertos internacionales de Lisboa y Porto, ordenando'l cese de los vuelos en tol espaciu aereu portugués. Unidaes de la marina de guerra xuntaronse a la revuelta y garraron el control de los puertos del Atlánticu, de Madeira y de les Azores.

Magar al entamu les tropes de l'aviación caltuviéronse indecises, aceptaron siguir al MFA por cuenta de la decidida actuación de les tropes del exércitu. A les 04:00 hores el gobiernu de Caetano tuvo conocencia de la revuelta y perdióse el factor sorpresa, pero les órdenes del gobiernu (dictaes durante los trés hores siguientes) pa detener a los rebeldes pola fuercia nun fueron obedecíes^[2] y llueu les fuercies del MFA controlaron puntos claves del país a les 09:00 hores.

===Tres l'amanecer del 25 d'abril Unu de los finxos d'aquelles concentraciones foi la marcha de les flores en Lisboa, carauterizada por un ensame pertrechada de claveles, la flor de temporada. Una camarera, Celeste Caeiro, que tornaba a casa cargada de les flores retiraes de los adornos d'una llacuada suspendida pola situación, nun pudo dar el pitu qu'un engaramaníu soldáu pidía-y dende un tanque na plaza del Rossio, xusto al entamu del Llargu do Carmo, onde los tanques de los sulevaos aguardaben nueves órdenes nuna tirante espera dende la madrugada. Como la moza namái llevaba los manizos de claveles, diolu unu. El soldáu poner nel so cañón y los compañeros repitieron el xestu asitiándolos nos sos fusiles, como símbolu de que nun deseyaben disparar les sos armes, estendiéndose l'aición por tola ciudá^[3] y xenerando el nome con que la revuelta pasaría a la historia. Al empezar la sulevación en Lisboa (02:00 hores), les tropes rebalbes ocupen les instalaciones de la Rádio Nacional y del Rádio Clube Português, a partir de les cualos emiten los sos comunicaos.

Les aiciones militares fueron protagonizaes tamién pol capitán Salgueiro Maia que, al mandu de les fuercies de la Escola Prática de Cavalaria, salió de Santarém pa colar sobre Lisboa con una columna de tropes. Na capital llogró l'adhesión de más tropes y colles ocupó'l Terreiro do Paço a primeres hores de la mañana del día 25, lluchando por caltener l'orde, evitar falcatrúes de civiles y convencer a les fuercies militares de la capital qu'entá se topaben en duda ante los sucesos.

El profesor Marcelo Caetano abellugar colos sos ministros nel cuartel del bairro del Carmo, en Lisboa, que foi abarganáu pol MFA a les 10:00 hores del 25 d'abril sofitáu por un ensame de manifestantes. La intervención d'un buque de l'Armada na desaguada del Tajo pa lliberar a Caetano y los sos ministros fracasa a les 12:00 hores^[2] mientres los comunicaos del MFA declaren tener so control tol país y que "avérase la hora de la lliberación"; Caetano aldericó la situación col capitán Salgueiro Maia, quien dirixía a les tropes sulevaes del Carmo, y que-y presentó un ultimátum a les 14:30 hores p'abandonar el gobiernu.

En venciendo a les 16:00 hores l'ultimátum pa la rindición del gobiernu, y siendo imposible cuntar con sofitos significativos nes fuercies armaes pa defender al réxime, Marcelo Caetano pidió a Salgueiro Maia rindise ante un oficial d'alta graduación,^[4] a lo cual aportó Salgueiro.

Pa esi fin dio avisu al xeneral Antonio de Spínola, unu de los xefes del MFA nel cuerpu de caballería, quien allegó al Cuartel do Carmo pa recibir la rindición de Caetano a les 17:45 hores. Caetano indicó a Spínola que capitulaba con tol so gabinete ante un xeneral «pa evitar que'l poder caya na cai» y foi sacáu colos sos ministros nun tresporte de tropes Bravia Chaimite a les 19.00 hores,^[4] metanes l'ensame nes cais, pa ser calteníu so arrestu. Hores dempués Caetano y los sos ministros partieron al exiliu en Brasil.

A les 20.00 hores les tropes del MFA ocuparon el cuartel xeneral de l'aviación en Lisboa y arrestaron a líderes del gobiernu Caetano que s'abellugaren ellí, ensin resistencia; en paralelu los homes del MFA tomaron los últimos cuarteles de Lisboa onde aguantaben oficiales lleales a Caetano,^[2] que se rindieron ensin llucha en tantu la gran mayoría de reclutes y suboficiales pasárense hores antes a les files del MFA.

Magar que los xefes del MFA aportunaron en que deseyaben evitar violencies, la revuelta provocó cuatro muertos y decenes de mancaos causaos polos disparu de dellos axentes de la PIDI, la policía política, dende'l so cuartel xeneral lisboeta contra manifestantes civiles a les 20:30 hores nun esfuerciu por aguantar al golpe d'Estáu; los axentes policiales quedaríen corralaes por tropes afectes al MFA y rindiríense a les 09.46 hores del día siguiente.^[2] L'ausencia de sofitu al réxime ente les Fuercies Armaes causó que la policía política rindiérase pocu dempués,^[1] al ser invidable oponese pola fuercia a una revuelta militar masiva.

A les 01:00 hores del 26 d'abril, la televisión y la radio estatales presentaron a los miembros del MFA encabezaos pol xeneral Spínola, que yá asumieren el control de tol país y que taríen encargaos del gobiernu a partir d'entós.^[5] Constituyóse la Xunta de Salvación Nacional.

Darréu al día 25, fueron lliberaos los presos políticos de la Prisión de Caxias. Producióse tamién la torna dende l'exiliu de los líderes políticos de la oposición: el socialista Mário Soares tornó a suelu portugués el 29 d'abril y el comunista Álvaro Cunhal, el 30.^[1] Al añu siguiente convocáronse unes eleiciones constituyentes y establecióse una democracia parllamentaria similar a les d'Europa Occidental. Con tou, la Revolución bastió'l fin del imperiu colonial portugués n'África, anque de manera desordenada pos les guarniciones africanes recibieron la simple orde de volver a la metrópolis y dexar el poder a los movimientos de lliberación, ensin coordinar primeramente'l trespasu de poder éstos, a pesar que los grupos independentistes africanos escarecíen de cuadros políticos y téunicos abondos p'asumir funciones gubernamentales. Pa cuelmu, la medrana a represalies de les nueves autoridaes motivó una emigración «a la inversa» de casi 500 000 civiles portugueses residentes n'África, los «retornaos», dende terratenientes hasta obreros y tenderos, que tuvieron d'abandonar trabayos y bienes en suelu africanu en cuestión de selmanes.

Duró dos años el periodu aturbolináu que siguió a la Revolución de los Claveles, carauterizáu por lluches ente la esquierda y la derecha. Esi periodu pasó a la historia como'l Procesu Revolucionariu en Cursu o PREC, una designación ambigua usada polos gobernantes que da cuenta de la falta de definición del aldu de los acontecimientos. Asocediéronse cinco gobiernos provisionales, cada vez más radicales.^[6] Hubo dellos intentos de golpe militar derechiegu pa paralizar el procesu: el 28 de setiembre de 1974 y el 11 de marzu de 1975, episodios derrotaos tres los cualos aceleróse la radicalización política del réxime.

Foi nacionalizada tola banca y la mayor parte de la gran industria. En marzu de 1975 l'ala d'oficiales comunistes del Movimientu de les Fuercies Armaes anunció que s'empecipiara la transición al socialismu». Sicasí, les eleiciones constituyentes d'abril de 1975 dieron la victoria a fuercies socialistes moderaes, más cercanes a la socialdemocracia de partíos como'l SPD alemán o'l PS francés, que llucharon por suprimir la influencia política de militares pro-comunistes, siendo sofitaos por un fuerte nucleu derechiegu concentráu nes provincies al norte del Tajo.^[7] Na seronda de 1975, el país tuvo cerca d'una guerra civil, pero un fallíu intentu de golpe d'estáu de militares pro-comunistes el 25 de payares estabilizó la situación. El réxime socialista desarmó y llicenció a los oficiales revolucionarios y restauró la disciplina xerárquica ente les tropes, curiando que los puestos claves del poder queden en manes de los partíos políticos más votaos. Nesa situación más sele aprobóse la constitución de 1976 y empecipióse l'afitamientu de la democracia.

Na vecina España franquista la situación de Portugal foi vista con esmolición, con medrana non yá de la facilidá con que fuera derrocada la dictadura salazarista (considerada inclusive «más sólida» que'l mesmu franquismu) sinón sorprendíu pola serie de fondos tresformamientos políticos asocedíes en cuestión de meses. A pesar de qu'en tou momentu'l nuevu gobiernu revolucionariu portugués manifestó'l so absolutu respetu pol sistema políticu internu d'España, y la so voluntá de caltener bones rellaciones col vecín peninsular, l'amenaza de cayida del franquismu yera latente. Por ello, el gobiernu español sofitó viviegamente a la derecha portuguesa opuesta al MFA y en paralelu fortaleció la represión política dientro d'España pa evitar que l'exemplu portugués alimentara a la grupos opositores. Éstos, como s'esperaba, doblaron les sos actividaes de propaganda polos mesmos motivos, ayudaos pola evidencia que'l golpe d'estáu de Portugal fuera bien pocu violentu magar un contestu más difícil que l'español y por tanto la cayida del franquismu podría asoceder tamién de manera pacífica, estenando les medranes de la población española ante un cambéu de réxime.

Pela so parte la OTAN nun amosó inicial esmolición ante la Revolución d'Abril» en tanto Portugal siguiera cumpliendo los sos deberes como miembru de la «Alianza Atlántica» pero la postura de la OTAN (y especialmente d'Estaos Xuníos) tornóse llueu en medrana a que los comunistes portugueses controlaren el MFA ya impunxeren una dictadura pro-soviética^[8]nun país con gran potencial xeopolíticu nos años de la Guerra Fría, al tener bases estratéxiques nel Atlánticu Norte (islles Azores y Madeira) y una peramplia mariña oceánica. Sicasí, el cursu de los acontecimientos en 1974 y 1975 col debilitamientu internu de los comunistes, l'ascensu de los socialistes y la subsistencia d'una fuerte corriente de dereches al norte del Tajo, más les informaciones de diplomáticos anglosaxones en Lisboa y Madrid,^[9] desaconseyaron al presidente d'Estaos Xuníos Gerald Ford una intervención militar en Portugal, considerándose abondes les actividaes secretes desenvueltes nel país.

El día 25 d'abril ye festividá nacional en Portugal y suel acoyer conmemoraciones y celebraciones cíviques. En 2014, Portugal emitió una moneda celebrando'l 40º aniversariu de la Revolución.

• Cine **

Capitanes d'abril filme empobináu por María de Medeiros (2000)

• • A la revolución nun 2 CV, filme italianu de Muricio Sciarra (2001)
• Procesu Revolucionariu en Cursu
• Tercer República Portuguesa

• Artículos orixinales: Wikipedia en francés, inglés y portugués
• Traducción orixinal y adautación del Claveles artículu (enllaz rotu disponible n'Internet Archive; ver l'historial y la última versión). de la Enciclopedia Llibre n'Español Archiváu 2003-11-29 en Wayback Machine

•   Wikimedia Commons tien conteníu multimedia tocante a Revolución de los Claveles.
• Phil Mailer, "Portugal – The Impossible Revolution?" (16 capítulos más introducción por Maurice Brinton)
• Accounts of the Carnation Revolution by U.S. diplomats Association for Diplomatic Studies and Training (ADST)
• La Revolución de los Claveles y la so influencia n'España
• Centro de Documentação 25 d'Abril, Universidá de Coimbra. Semeyes, minibiografías, cartelos polítiques de la dómina y grabaciones visuales de la sulevación
• 25 d'abril de 1974: videu del sitiu del cuartel del Carmo (Youtube: "Portugal, Lisboa. Revoluçao de 25 d'abril de 1974")