Wikipedia:分類、一覽同導航模

呢頁喺英文維基百科嘅對應頁係一項政策同指引，但係喺粵文維基百科重未達成共識，內容只供參考。 請參照英文版嘅對應頁或者討論頁以進一步完善內容，提議同埋參與討論佢係咪可以成為粵文維基百科嘅正式方針或者指引。

捷徑 WP:CLNT WP:CLN

一句講嗮：分類、一覽同導航模係三種唔同方法去連繫同一主題嘅文章。雖然佢哋有自己嘅優點同缺點，但都可以互補不足。

維基百科連繫同一主題嘅文章嘅方法包括分類（Category）、一覽（List）同導航模（Navigation template）。用咗其中一個方法唔代表唔用得第二個。相反，由於每個方法都有自己嘅優點同缺點，應該獨立跟從各方法嘅指引同標準去用。

粵文維基百科嘅指引暫時係簡化版本，完整版本嘅指引可以參考英文維基百科：Wikipedia:Categories, lists, and navigation templates。

同時用分類、一覽同導航模去涵蓋同一主題，係正當同唔罕見嘅。呢種方式算係互補不足，而唔算係重覆。喺刪除討論入面，唔應該話因為已經存在分類而要刪除一覽（或者掉轉）。亦唔應該將一覽跳轉到分類度。

一個分類嘅範例：「Category:流行歌手」。一篇文章至少都要有一個分類。分類應該要同主題有關，同埋對讀者有用。譬如「卜戴倫」，「Category:美國男歌手」係個有用嘅分類，「Category:個名B字頭嘅歌手」就唔係有用嘅分類。

文章通常都會有多個分類，但係應該適可宜止，如果太多分類，效用就會減少。

文章唔應該同時放落一個分類同佢嘅子分類。譬如「Category:Microsoft Office」已經放咗落「Category:微軟軟件」，就唔應該重覆放落「Category:軟件」度。

分類唔可以加註解，所以當開分類同放文入分類時，一定要留意中立嘅觀點。

如果見到篇文無加分類，可以嘗試喺Category:主要分類項下搵合適嘅分類加落去，如果真係搞唔掂，可以掛個 {{Uncategorized}} ，文章會自動放落 Special:UncategorizedPages，等其他人幫手搞。

一覽嘅範例：香港演員一覽、日本演員一覽、日本配音員一覽、日本足球員一覽。

導航模係將同一主題嘅文章連結放落一個模，再將個模放喺呢啲文章，方便喺呢啲文章之間瀏覽。導航模有兩種：水平放頁底嘅「導航盒」（Navbox）同垂直放頁面右上角嘅「側欄」（sidebar）。相關嘅說明可以睇下Template:Navbox/doc同Template:Sidebar/doc。

每條連結應該清楚畀讀者見到。一般情況下，應該用返維基百科預設嘅顏色，即係正常連結藍色、未開版嘅連結紅色。

唔應該太過依賴導航模去顯示相關文章，因為導航模唔會喺流動版網頁顯示。

喺一篇文章放咗個導航模嗰陣，個導航模應該要有嗰篇文章嘅連結，確保個導航係雙向嘅。

唔好將藝人嘅演出作品加落導航模，又或者將製作人員嘅作品加落導航模。適用對象包括但唔限於演員、喜劇演員、電視同廣播節目主持人、作家、作曲家等等。咁係避免藝人文章底部會有個好大個嘅導航模，亦避免各作品文章有唔合理比重去提及個別藝人嘅參與。同一道理，個人演出作品一覽亦唔應該放落導航模，除非個人被認為係嗰個作品嘅主要創作者。