豎手指公

豎手指公，又叫讚好手勢，係將手指公豎起、其餘手指握實嘅手勢，通常代表讚好嘅意思。如果上下掉轉，就代表批評。

喺香港手語裡面，豎手指公係一個好常見嘅手形。除咗好似平常噉表示好/壞之外，呢個手形亦都可以用嚟模仿唔同嘅嘢，例如將手指公想將成頭，拳頭想像成身軀；又或者將成個豎手指公手形想像成將一啲嘢倒出嚟^[1]：

• 好/壞引申意思：
  • 好（就噉向上豎手指公）
  • 壞（就噉向下豎手指公）
  • 成功/合格/贏（向上豎手指公再向上舉）
  • 失敗/唔合格/輸（向下豎手指公再向下壓）
• 表示頭、身軀：
  • 多謝（向上豎手指公，再屈手指公兩下）（模仿人鞠躬、點頭）
  • 朋友（兩隻手向上豎手指公，並埋一齊）
• 表示傾倒：
  • 科學（兩隻手豎手指公，輪流向下傾倒）（模仿化學科將啲嘢溝埋一齊）

唔係每個地方豎手指公都等同讚好。喺意大利、希臘，同埋中東國家，例如伊朗、伊拉克、阿富汗等，噉做係等同舉起中指，係嚴重嘅粗口手勢，所以去到其他地方嗰陣要特別留意^[2]。又例如非洲有部落，讚好手勢或者表示惡劣有自己一套手語。

同手指公有關嘅統一碼（Unicode）包括：

• U+1F44D 👍 thumbs up sign
• U+1F44E 👎 thumbs down sign
• U+1F592 🖒 reversed thumbs up sign

喺顏文字入面，好多時都會用細楷英文字母「b」或者「d」去代表一個豎向上嘅手指公，去表示讚賞、同意等等嘅意思。最簡單嘅用法就係加一條橫線去表示隻手腕：-b 或者 d-。再複雜啲嘅可以用其他符號整塊面出嚟，再擺隻手指公喺塊面隔籬，例如：(^^)b 或者 (･ω･)b^[3]。有啲即時通訊軟件例如Facebook messanger、Whatsapp會用(y) 同 (n) 去作為向上同向下舉手指公嘅快捷鍵^[4][5]。