現代化

現代化（英文：Modernization），又可以叫作近代化，係用嚟形容一種社會同文化上嘅改變，一般意思係一笪地方工業化跟住成為發達國家嘅過程（根據學家 Paul J. Magnarella 嘅定義）^[1]。

由歷史上嚟講，現代化主要係講緊自從喺歐洲開始嘅科學革命同工業革命，令社會變做更加理性同埋講求知識。到依家，一般都係令個社會類似西方世界嘅價值觀，所以同西方化都有唔少嘅重叠位。呢個其實係因為歐美國家係第一個經過呢種現代化嘅過程，所以概念上有啲似。喺最普遍嘅定義，一個現代化嘅地方會有：學術上嘅知識（尤其係科學）、政治上民主化、經濟上工業化、文化同藝術上自由化、宗教上世俗化等等。

根據現代化嘅理論，隨住社會喺經濟上越嚟越發達，同時喺政治上亦都會偏向行自由民主制^[2]。呢種古典睇法係嚟自50同60年代，特別係 Seymour Martin Lipset^[2]，而佢嘅理論就係基於再之前嘅社會學學家，包括馬克斯、 涂爾幹、韋伯、同 Talcott Parsons^[3]。到1991年，福山提出咗佢最出名嘅歷史終結論（英文：End of history），代表住自由民主制已經贏咗冷戰，成為現代化嘅尾站^[4]。有唔少數據亦都發現，一笪地方工業化係同佢民主化嘅比例成正比，即係工業化嘅幾率越高，民主化嘅幾率亦都相對咁越高^[5][6][7]。

當然，現代化呢種理論非常之受爭議^[2][7][8][9]，其中最主要嘅就係工業化唔一定會導致民主化，歷史例子包括大日本帝國、德意志帝國、蘇聯、同埋中華人民共和國。仲有，呢個理論忽略咗民主倒退嘅情況，發生喺好多拉丁美洲嘅國家身上^[7]。所以，有唔少學家都認為，工業化對民主化係有幫助，但係並絕對唔係必然^[10]。有啲學家就提出一個調返轉嘅理論，話民主化係會幫手推行工業化^[11][2]。

一般大家認為現代化包括下面嘅社會過程^[1]：

1. 技術嘅發展：物理、化學、同生物學嘅科學知識同技術，令人能夠通過學習同瞭解，更加識得點樣控制個自然環境
2. 工業嘅發展：藉住精準嘅控制，加上分工合作，令生產越嚟越機械化，而大量生產令市面上嘅產品越嚟越多
3. 世俗化嘅發展：因為教育嘅演進，識字率可以大幅提升，加上傳送資訊變得越嚟越容易，令宗教嘅力量減弱，大家改為用理性去諗嘢
4. 城市化嘅發展：人口集中趨勢成為現代社會嘅特點，法律制度嘅普及化，連帶影響到政治、經濟、文化、居住生活嘅方式等等，例如交通工具嘅發達令全世界移民嘅人數大增。
5. 政治嘅發展：現代政治嘅特點，就係普羅大眾都，至少名義上，能夠參與到個政治過程。呢個喺唔同制度上都可以係真，包括法西斯主義、共產主義、定係民主嘅憲法制度都係。

隨住現代化嘅發展，社會文化各個方面都會隨住佢而發生變化。官僚政治逐漸發展；學習嘅機會多咗；宗教信仰同傳統習俗嘅影響力弱咗；人與人之間嘅關係會發生變化；社會流動亦都大咗^[1]。現代化嘅一個方面是技術嘅大爆炸，令到人類所有嘅諗頭可以喺光速嘅速度嚟傳開去。唔同文化之間嘅差別越嚟越細，實現到全球化，而專業技術嘅領域上，就越嚟越廣汎^[1]。

一定要特別留意呢啲理論嘅公理，近年嚟受到多方面嘅實證資料嚟挑戰呢啲理論（睇埋後現代）。