元洲

元洲（Un Chau），原寫圓洲，係香港一笪地方，響家下新九龍深水埗裏面，大約家係長沙灣道、大埔道、南昌街同桂林街框（讀入聲）住個範圍。未發展做市區之前，元洲原本係條村，位置響原深水埗北便。佢隔籬有三條村，東南便有田寮，西便有菴由，西北有 Ma Lung Hang。

元洲呢個名，好可能係由圓洲而來，原本可能係圓形嘅島，不過呢度唔係歷史要地，不見經傳，無從稽考。元洲東面係有條涌，流去原深水埗北便，呢條涌最後變成今日南昌街條暗渠。而村北面又另一條。元洲周圍都幾平，有兩條涌水源，所以好啱種田^[1]。1924年，南便深水埗已經發展近元洲村邊^[2]，最後元洲村都埋響都市之下。香港政府就將大埔道同長沙灣道之間三條街，分別叫做菴由街、田寮街同元洲街^[3]。前面嗰兩條最後都改咗名，叫福華街同福榮街^[4]，淨返元洲街。

元洲街跟住長沙灣填海，拉到好長。後尾1965年響長沙灣新填地，政府起咗元洲街政府廉租屋邨，減筆元洲街邨，即係家下元州邨。不過條邨同元洲個位置爭好遠。除咗元州邨，元洲街公共圖書館同埋香港扶幼會元洲宿舍個名都間接來自元洲。

家下元洲最出名就係黃金同高登電腦商場，而深水埗就響正元洲南邊。不過已經甚少人知道呢度係元洲。甚至有人誤會元洲係元州，以為係中國某處地名。

1. ↑ 《1902-03年香港政府地圖》。
2. ↑ 《1924年政府地圖》。
3. ↑ 〈二十年代尾命名道路〉。原著喺2017年11月7號歸檔。喺2007年4月21號搵到。
4. ↑ 〈香港地方：曾改名道路〉。原著喺2008-04-30歸檔。喺2008-05-29搵到。