借代
借代，又叫轉喻、換喻，係種修辭手法，即係指用本體嘅一部分，或者同本體有密切關係嘅其他嘢，嚟代替本體嘅整體。借代可以理解為借一物全方面噉代替另一物。兩個主體嘅關聯性好重要，如果兩者嘅關係唔係一目了然嘅話，要靠解釋指出嘅話，關係就唔夠密切，所以兩者關係一定乎合常識。
借代雖然有啲別稱有個「喻」字，但係佢唔屬於比喻。如果係用本體嘅一部分嚟代替整體，可以叫做提喻，不過好少噉叫。
同借喻嘅分別
[編輯]借代成日同借喻撈亂，以下係兩者嘅一啲分別：
- 借代嘅兩個主體冇相似關係；而借喻嘅兩個主體有相似關係。
- 借代嘅兩個主體係有主次嘅關係，本體係重點，代替本體嘅只係替代品，只要合理，其他嘅嘢嚟借代本體都冇分別；而借喻嘅兩個主體係對等嘅關係，兩個主體一樣喺句子入面一樣咁重要，喻體唔同嘅話，意思會變。
- 借代用嘅係本體嘅一部分，或者同本體有密切關係嘅其他嘢；而借喻用嘅係冇咩關係嘅事物。
- 借代係用嚟代表本體嘅整體；而借喻係用嚟代表本體其中相似嘅地方。
例子
[編輯]例句
[編輯]- 「臣本布衣，躬耕於南陽。」諸葛亮《出師表》
- ——「布衣」借代「平民百姓」
- 「黃髮垂髫，並怡然自樂。」陶淵明《桃花源記》
- ——「黃髮」借代「老人家」，「垂髫」借代「細路仔」
- 「但我不能放歌，悄悄是別離的笙簫。」徐志摩《再別康橋》
- ——「笙簫」借代「音樂」
- 「但願人長久，千里共嬋娟。」蘇軾《水調歌頭》
- ——「嬋娟」借代「月亮」
- 「羽扇綸巾，談笑間，檣櫓灰飛煙滅。」蘇軾《念奴嬌 赤壁懷古》
- ——「檣櫓」借代「船」
- 「商旅不行，檣傾楫摧」范仲淹《岳陽樓記》
- ——「檣傾楫摧」借代「沉船」
- 「縈青繚白，外與天際，四望如一。」柳宗元《始得西山宴遊記》
- ——「青」借代「山」，「白」借代「水」
- 「何以解憂？唯有杜康。」曹操《短歌行》
- ——「杜康」借代「酒」
- 「朱門酒肉臭，路有凍死骨。」杜甫《自京赴奉先詠懷五百字》
- —— 「朱門」借代「有錢人家」，「凍死骨」借代「窮人嘅屍體」
- 巾幗不讓鬚眉。
- ——「巾幗」借代「女人」，「鬚眉」借代「男人」
詞例
[編輯]睇埋
[編輯]
