中華人民共和國政區
| 中華人民共和國政區分級 |
|---|
| 省級 |
| 省 |
| 自治區 |
| 直轄市 |
| 特別行政區 |
| 地級 |
| 地級市 |
| （包括副省級市） |
| 自治州 |
| 盟 |
| 縣級 |
| 縣 |
| 自治縣 |
| 縣級市 |
| （包括副地級市） |
| 市轄區 |
| 旗 |
| 自治旗 |
| 鄉級 |
| 鄉 |
| 民族鄉 |
| 鎮 |
| 街道 |
| 蘇木 |
| 民族蘇木 |
| 縣轄區 |
| 中華人民共和國 |
 呢篇文係關於 |
|
|
| 中華人民共和國憲法 最高領導人 / 國家元首 習李體制 / 李克強政府 |
 中國共產黨
|
|
|
 中華人民共和國政府
|
|
|
| 地方行政區 |
| 統一戰線 |
|
| 民主黨派 |
| 選舉 |
| 睇埋 |
| 一國兩制 香港政治 / 澳門政治 |
| 兩岸關係 中華民國政治 / 台灣政治 |
|
類:國政 • Portal:政治 |
省級
[編輯]現時中華人民共和國有33個省級政區（無計臺灣）。其中：
- 省有22個，中華人民共和國宣稱臺灣省（現由中華民國實際管轄）係第23個省。
- 自治區5個
- 特別行政區2個
- 直轄市4個。雖然係城市但城外嘅縣管有農村地區。典型嘅係重慶市，佢下轄嘅農村地區遠大於市區。
直轄市
[編輯]直轄市之下轄有區、縣，直接管到縣級，無地級政區。其中重慶有自治縣。
| 市名 | 而家官方英文名 | 傳統英文名 | 簡稱 |
|---|---|---|---|
| 北京市 | Beijing | Peking | 京 |
| 天津市 | Tianjin | Tientsin | 津 |
| 上海市 | Shanghai | Shanghai | 滬 |
| 重慶市 | Chongqing | Chungking | 渝 |
各省
[編輯]| 省名 | 而家官方英文名 | 傳統英文名 | 簡稱 | 省城 |
|---|---|---|---|---|
| 安徽省 | Anhui | Anhwei | 皖 | 合肥市 |
| 福建省 | Fujian | Fukien, Foukien | 閩 | 福州市 |
| 甘肅省 | Gansu | Kansu | 甘/隴 | 蘭州市 |
| 廣東省 | Guangdong | Kwangtung, Kuangtung | 粵 | 廣州市 |
| 貴州省 | Guizhou | Kweichow | 黔/貴 | 貴陽市 |
| 海南省 | Hainan | Hainan | 瓊 | 海口市 |
| 河北省 | Hebei | Hopeh, Hopei | 冀 | 石家莊市 |
| 黑龍江省 | Heilongjiang | Heilungkiang, Heilungchiang | 黑 | 哈爾濱市 |
| 河南省 | Henan | Honan | 豫 | 鄭州市 |
| 湖北省 | Hubei | Hupeh, Hupei | 鄂 | 武漢市 |
| 湖南省 | Hunan | Hunan | 湘 | 長沙市 |
| 江蘇省 | Jiangsu | Kiangsu, Chiangsu | 蘇 | 南京市 |
| 江西省 | Jiangxi | Kiangsi, Chiangsi | 贛 | 南昌市 |
| 吉林省 | Jilin | Kirin | 吉 | 長春市 |
| 遼寧省 | Liaoning | Liaoning | 遼 | 瀋陽市 |
| 青海省 | Qinghai | Tsinghai | 青 | 西寧市 |
| 陝西省 | Shaanxi | Shensi | 陝/秦 | 西安市 |
| 山西省 | Shanxi | Shanxi | 晉 | 太原市 |
| 山東省 | Shandong | Shantung | 魯 | 濟南市 |
| 四川省 | Sichuan | Szechuan, Szechwan | 川/蜀 | 成都市 |
| 雲南省 | Yunnan | Yunnan | 雲/滇 | 昆明市 |
| 浙江省 | Zhejiang | Chekiang, Chechiang | 浙 | 杭州市 |
宣稱有主權但冇實際管轄嘅省
[編輯]自1949年成立以來，中華人民共和國就宣稱臺灣係佢嘅省，叫臺灣省，並宣佈中華民國係非法政權。但係而家中華民國不但有效統治咗臺灣省（臺灣島同澎湖），重統治埋福建省嘅金門縣同連江縣嘅一部份。與此同時，中華民國宣稱佢嘅法理版圖重包括中國大陸（包括西藏）、外蒙同唐努烏梁海[3]。雖然1991年中華民國總統李登輝無正式宣布放棄法理版圖，但實際上修過憲後，喺臺灣嘅國會默認咗家下嘅統治狀況[4]。中華民國政府已經將臺灣省治移出臺北到中興新村，並將臺北、高雄、新北、臺中、臺南升格做院轄市（同臺灣省同級），但中華人民共和國唔承認臺灣省治嘅轉移同埋臺灣政區嘅變動。
自治區
[編輯]自治區（英文：autonomous region）係指定畀少數民族嘅省級政區，根據民族區域自治制度，喺唔違憲嘅情況下有更多嘅權。譬如，佢哋嘅阿頭（自治區人民政府主席，相當於省長；以及自治區嘅人大常委主任或者副主任）會係呢個自治區所指定嘅少數民族（藏族、維吾爾族等等）[5]；行政上可以用當地通用嘅一到幾種嘅語文[5]。立法上可以根據本地民族嘅政治、經濟、文化特點來制定自治條例同埋單行條例，不過要全國人大常委會批準咗先生效[5]。
中華人民共和國係參照蘇聯嘅政體成立自治區。家下有5個自治區。
| 名 | 英文名 | 少數民族 | 名（所指定嘅少數民族嘅話） | 簡稱 | 首府 |
|---|---|---|---|---|---|
| 廣西壯族自治區 [6] | Guangxi | 壯族 | 拉丁壯文 - Gvangjsih Bouxcuengh Swcigih |
桂 | 南寧市 |
| 內蒙古自治區 [7] | Inner Mongolia | 蒙古族 | 蒙古文（傳統、拉丁） - ᠥᠪᠥᠷ ᠮᠤᠩᠭᠤᠯ ᠤᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠤᠷᠤᠨ/ Öbör Monggol-un öbertegen ǰasaxu oron/ 
|
內蒙古 | 呼和浩特市 |
| 寧夏回族自治區 | Ningxia | 回族 | 小兒經 - نٍشيَا خُوِذُوْ ذِجِثُوْ |
寧 | 銀川市 |
| 新疆維吾爾自治區 | Xinjiang | 維吾爾族 | 維吾爾文（傳統、新維文） - شىنجاڭ ئۇيغۇر ئاپتونوم رايونى / Shinjang Uyghur Aptonom Rayoni |
新 | 烏魯木齊市 |
| 西藏自治區 | Tibet | 藏族 | 藏文（傳統、拉丁） - བོད་རང་སྐྱོང་ལྗོངས / Bod.raṅ.skyoṅ.ljoṅs |
藏 | 拉薩市 |
民族自治地方
[編輯]由於中華人民共和國實行民族區域自治制度，喺少數民族聚居或者佔優勢嘅地方會設立民族自治地方。呢項制度嘅法律基礎係《中華人民共和國憲法》同埋《中華人民共和國民族區域自治法》。注意，只有省級、地級、縣級嘅民族自治政區先叫做民族自治地方，分別係：
另外，由於盟、旗、自治旗係蒙古地區特殊嘅政區，所以亦係實際上嘅民族自治地方。
而縣級以下嘅，比如民族鄉、民族蘇木、蘇木、民族鎮、民族村等等呢啲，唔係民族自治地方。
特別行政區
[編輯]特別行政區（英文簡寫：SAR）係喺一國兩制嘅體制下有好高程度自治嘅政區，據特別行政區基本法第12條，特別行政區直接受國務院管理。
家下中國有兩個特別行政區：
| 名 | 英文名 | 簡稱 |
|---|---|---|
| 香港特別行政區 | Hong Kong | 港 |
| 澳門特別行政區 | Macao | 澳 |
地級
[編輯]地級，又叫地區級，介乎於省級同縣級之間，設喺省、自治區，有呢啲類型嘅政區：
- 地區：家下幾乎所有地區都變曬做地級市，得返14個地區，主要喺西藏（6個）同新疆（7個），另外黑龍江有1個。
- 自治州：而家有30個。自治州係地級嘅民族自治地方。其中伊犁係副省級自治州。
- 地級市：包括副省級市。到2013年2月8號，全中國有286個地級市[8]。
- 盟：得內蒙古先有，原先嘅盟都變曬做地級市，得返3個盟。
一個地級政區可以包括好多嘅縣、區等縣級政區，亦有唔設縣級政區，直轄到鄉級政區，即係四個唔設區嘅地級市：中山、東莞、嘉峪關、三沙。唔係所有嘅縣級政區都直隸於地級政區，除咗直轄市、特別行政區直管到縣級政區外，亦有啲省、自治區直轄啲縣級市、縣、林區、自治縣。此外有一個特例，即係新疆伊犁州，伊犁州下面管轄嘅兩個地區（塔城、阿勒泰）都同伊犁州一樣係地級，所以伊犁州實質上係副省級自治州。
縣級
[編輯]縣級，有呢啲類型嘅政區：
- 縣（英文：county）。目前維基百科統一譯爲county，不過喺一啲資料譯爲district，甚至係prefecture。
- 自治縣（英文：autonomous county），係縣級嘅民族自治地方。
- 縣級市（英文：county-level city），有部分縣級市升為副地級市（英文：sub-prefecture-level city）。
- 市轄區，簡稱區（英文：district），包括副省級市轄區，設喺直轄市、地級市嘅市區。
- 旗（英文：banner），內蒙古先有嘅縣級政區。
- 自治旗（英文：autonomous banner），得內蒙古先有，而且得3個。
- 此外重有一個林區（英文：forestry district/area），受湖北省管轄嘅神農架，以及一個特區（英文：special district），貴州嘅六枝。
到2011年底，成個中國大陸有2853個縣級政區，其中有857個區、369個縣級市、1456個縣、117個自治縣、49個旗、3個自治旗、1個特區、1個林區[9]。
縣級政區唔一定就屬於地級政區，有啲縣級政區屬於省級政區，比如直轄市、特別行政區下面管嘅區、縣，有啲省、自治區直轄縣級市、縣、林區、自治縣。縣級政區亦可以唔設，比如有四個唔設區嘅市：中山、東莞、嘉峪關、三沙。
鄉級
[編輯]鄉級政區喺鄉村地方同城市地方所設嘅政區類型有唔同。
- 喺鄉村地方
- 鄉（英文：township）
- 鎮（英文：town）
- 民族鄉（英文：ethnic township）
- 喺內蒙古會有蘇木（英文：sumu）同民族蘇木（英文：ethnic sumu）
- 喺城市地方
- 街道辦事處或者就叫街道、街辦（英文：sub-district）
此外重有縣轄區（簡稱區），佢嘅行政機構叫區公所（英文：district public office），喺撤區併鄉之前係大部分縣嘅主要政區，因爲佢管埋啲鄉鎮，所以實質佢嘅地位高過一般鄉鎮，介乎於縣同鄉之間。而家得番2處縣轄區，係舊時政區嘅殘積。
最後重有類似鄉級單位，呢啲單位有自己管轄地頭，有類似同級嘅政府嘅管理權限，比如開發區、科技園、大學城、農場、果園、甚至監倉都得。
鄉、鎮、民族鄉、蘇木、民族蘇木呢啲有自己嘅政府；街道、縣轄區其實係縣級政府嘅派出機構，直屬於上頭，無自己嘅政府，相比其他類型無咩點自治。
到2011年底，成個中國大陸有40466個鄉級政區，其中有兩處縣轄區、19683個鎮、12395個鄉、106個蘇木、1085個民族鄉、1個民族蘇木、7194條街道[9]。
村級
[編輯]村級政權唔係正式嘅政權，嗌做「基層群眾自治組織」。
- 喺城市、城鎮環頭
- 政區嗌社區，有時啲人嗌佢做小區，亦有居住區、居民區嘅稱呼，英文譯做communities、neighborhoods。
- 社區對應嘅組織嗌居民委員會（略：居委會），居委會下面再拆成居民小組。
- 喺鄉下地方
- 政區嗌村（行政村），喺遊牧地區，則係設嘎查。
- 政區對應嘅組織嗌村民委員會（略：村委會，英文village committees），村委會下面再拆成村民小組，英文譯爲villager groups。
參攷
[編輯]- ↑ 現行嘅憲法係1982年《中華人民共和國憲法》，其中規定政區劃分嘅條文如下：
（一）全國分爲省、自治區、直轄市；
（二）省、自治區分爲自治州、縣、自治縣、市；
（三）縣、自治縣分爲鄉、民族鄉、鎮。
直轄市和較大的市分爲區、縣。自治州分爲縣、自治縣、市。 - ↑ 〈中華人民共和國行政區劃〉。中華人民共和國中央人民政府。原著喺2015年5月29號歸檔。喺2014年11月22號搵到。
- ↑ 呢個只係大概嘅講法，具體嘅唔止。比如同緬甸有江心坡等等嘅問題，同俄羅斯有江東六十四屯等等嘅問題。正文中嘅內容只係大範圍上嘅版圖部份。
- ↑ 亦即默認統治範圍限喺臺澎金馬。另外，中華民國同蒙古國已經互設辦事處，維持緊非正式嘅外交關係，換言之已經默認蒙古國作爲獨立主權國嘅事實。但係《中華民國憲法》未有修正。可睇〈有關外蒙古是否為中華民國領土問題說明新聞參考資料〉 (PDF)。中華民國行政院大陸委員會。2012年5月21號。喺2013年10月17號搵到。
- ↑ 5.0 5.1 5.2 〈中華人民共和國憲法 第三章 國家機構 第六節 民族自治地方的自治機關〉。新華網。喺2014年12月31號搵到。，睇其中第一百一十三條、第一百一十四條、第一百一十六條、第一百二十一條。
- ↑ 〈廣西簡介〉。原著喺2012年5月22號歸檔。喺2013年9月14號搵到。
- ↑ 〈內蒙簡介〉。原著喺2012年5月22號歸檔。喺2013年9月14號搵到。
- ↑ 〈民政部關於國務院批准設立地級三沙市的公告〉。中華人民共和國民政部。2012年6月21號。原著喺2012年6月25號歸檔。喺2013年2月22號搵到。
- ↑ 9.0 9.1 〈中華人民共和國民政部區劃地名司：中華人民共和國行政區劃統計表（2011年）〉。原著喺2014年4月13號歸檔。喺2014年3月25號搵到。互聯網檔案館嘅歸檔，歸檔日期2014年4月13號，.