ფილიპე არაბი
| ფილიპე არაბი ლათ. Philippus Arabs | ||
.jpg) ფილიპე არაბიშ ბიუსტი ერმიტაჟიშ მუზეუმს, სანქტ-პეტერბურგი, 2010 წანა | ||
 რომიშ იმპერატორი | ||
|---|---|---|
| პოსტის გერინაშ ბორჯი | ||
| ფურთუთა, 244 – ეკენია, 249 | ||
| წიმოხონი | გორდიანე III | |
| მონძე | დეციუსი | |
| დუნაბადი | დოხ. 204 ფილიპოპოლი, არაბეთი, რომიშ იმპერია | |
| ნაღურა | ეკენია, 249 (45 წანერი) ვერონა, იტალია, რომიშ იმპერია | |
| მუმა | იულიუს მარინუსი | |
| ალმასქუ | მარცია ოტაცილია სევერა | |
| სქუალეფი | ფილიპე II | |
| რელიგია | რომაული რელიგია ქირსიანობა (?) | |
ფილიპე I (ლათ. Marcus Julius Philippus; დ. დოხოლაფირო 204 — ღ. ეკენია, 249), შინელი რე მუჭოთ ფილიპე არაბი — რომიშ იმპერატორი 244-249 წანეფს.
ფილიპეშ ორდოიანი რინაშ დო პოლიტიკური კარიერაშ გეშა ბრელი მუთუნი ვარე რჩქინელი. დაბადებე თეხანური შაჰბას, დოხოლაფირო 204 წანას, ნამუთ ჸათე ბორჯის არაბეთიშ პროვინციაშ აკოდგინალუაშა მიშმეშჷ. შხვადოშხვა ისტორიკოსეფიშ ვარაუდით, ფილიპე ეთნიკურო არაბი ჸოფე, მარა თენა ხოლო ზუსტას ვერაგადე. რჩქინელი რე ნამდა გორდიანე III-შ მართუალაშ ბორჯის, ფილიპეს უკებუდჷ პრეტორიანალეფიშ პრეფექტიშ პოსტი. 243 წანას გორდიანექ წიმიჭყჷ ოურდუმე კამპანია სასანიანეფიშ მეხჷ. 244 წანას, მესიხეშ ლჷმას დოღურჷ გორდიანექ (შხვა ვერსიათ მუში უკმაყოფილე ჯარიშკოჩეფქ დოჸვილეს). არსებენს ვარაუდი ნამდა გორდიანეშ ღურას ფილიპე ხოლო მიშაძუდჷ. გორდიანეშ ღურაშ უკულ, ხეშულობა ფილიპექ ქაშეჸოთჷ ხეშა დო იმპერატორო გინირთჷ. თიქ სპარსალეფიწკჷმა ქუდოდვუ ოთინჩალე ხეკულუა, ნამუშ ნძალათ სპარსალეფს გინუგუ 500,000 დინარი, თინეფს დუთმუ სომხეთი, მესოპოტამია დო რომშა დირთჷ.
ფილიპე არაბიშ მართუალა იგინძარებუდჷ ხუთი წანაშ გოძვენას დო შხვა, წოხოლიანი იმპერატორეფიშ გენაწონს, უმოსი სტაბილურობათ იხასიათებუდჷ. 248 წანაშ პირელს, ფილიპეშ ინიციატივათ იმანჯჷ რომიშ დორსხუაფაშ ანთას წანაშ დუდი-დღახუქ. ფილიპეშ მართუალაშ პერიოდის ფშხირი რდჷ ბარბაროსეფიშ (გერმანული ტომეფი) მიშაჭკირუეფი რომიშ იმპერიაშ ტერიტორიეფიშა. 248 წანაშ ეკონია პერიოდეფს, გოთეფქ გემშეჭკირეს მეზიაშა, თრაკიაშა დო მარკიანოპოლი ქართას (ალყა) ქინახუნეს. ჸათე ბორჯის ქუმოხვადჷ უზურპატორეფიშ არყებეფქ ხოლო. ფილიპექ გინორინა მინდომუ, მარა სენატიქ თეში ნება ვემეჩუ. 249 წანას, ლეგიონეფქ იმპერატორო გეგმაცხადეს მუნეფიშ მანჯღვერთარი დეციუსი, ნამუქჷთ მუში ნძალეფით იტალიაშა გემშეჭკირჷ. ვერონაშ ლჷმას დეციუსიქ დამარცხჷ ფილიპე არაბი, ნამუქჷთ ბურჯაფიშ მიმალობას დოჸვილეს.
