Corridoio Vasariano

De Corridoio Vasariano is e galerye in Firenze die de Palazzo Vecchio met de Palazzo Pitti verbindt. D’overdekte passage is e kilometer lank en lopt via de Uffizi over den Arno olangsn de Ponte Vecchio.

Cosimo I de' Medici weunde me z’n vrouwe Eleonora in de Palazzo Pitti en in 1565 gaft ‘n ipdracht an Giorgio Vasari (vandoar de noame) vo de corridoio te bouwn. ’t Was ’t joar van den trouw van under oudste zeune Francesco I me Johanna van Oostnryk, de joungste dochter van keizer Ferdinand I. De bedoelienge was vor under zêre en veilig te kunn verplatsn van ‘t verbluuf van de grôotertog no de gebouwn woa dat ’n werkte. De corridoio was in vuuf moandn tyd gebouwd.

De galerye lopt over de Ponte Vecchio en zelfs deur e kerke (Santa Felicita), woadeure dan de Medici no de messe kostn goan zounder ounder ’t volk te kommn.

An ’t ende van de brugge stoat de Mannelli-torre, die binst de middeleeuwn gebouwd was vo de Ponte Vecchio te verdedign. Z’en de corridoio d’r round moetn bouwn, omdat de familie Mannelli de torre nie wilde loatn ofbreekn.

Cosimo I ’s oudste zeune Francesco I volgdeg’ em ip ols grôotertog van Toscane, mor in 1587 stierft ’n an malaria en je wierd ipgevolgd deur z’n broere Ferdinando I. ’t Was Ferdinando die in 1593 bepoalde dan d’r ollêne nog mo edelsmeedn mochtn stoan ip de brugge. D’r stoundn vodien ôok bêenouwers, vismarchangs en lêerlôoiers, die under ofvol in den Arno smêetn en Ferdinando wildeg’ etwa doen an de stank. Nu stoan d’r nog ossan surtout juweliers ip de brugge.

De corridoio is gerestoreerd en eropend vo ’t publiek in 1973, mo de galerye kan ollene mo bezocht wordn ip ofsproake of me groepn. Deur de rounde veisters e je e schôon zicht ip Firenze en binn angn d’r mêer of 1000 schilderyen van tusschn de 17e en 18e êeuwe en e belangryke collectie van mêer of 200 zelfportrettn deur sommigte van de bekendste kunstschilders tusschn de 16e en de 20e êeuwe, lik Alessandro Allori, Rembrandt, Pieter Paul Rubens, Diego Velasquez, Ingres, Marc Chagall, Andrea del Sarto, Bernini, Delacroix, Ensor ...

Kardinoal Leopoldo de’ Medici was begost me d’unieke collectie in ’t middn van de 17e êeuwe en d’r kommn d’r nog ossan by.

• 
  De corridoio gezien van de ponte Vecchio
• 
  Droai round de Mannelli-torre
• 
  Passage langs de Santa Felicita-kerke
• 
  Zicht in de kerke vanuut de corridoio

Mêer ofbeeldiengn die ier by passn ku je vien ip Corridoio Vasariano ip Wikimedia Commons.