Valdai (lidn)

Valdai
Валдай

Lidnanznam	Flag
Valdkund	Venäma
Eläjiden lugu (2020)	13,987 ristitud
Pämez'	Vladimir Litvinenko (sügüz'ku 2015—)
Telefonkod	+7−81 666-xx-xxx
Avtokod	53
Aigvö	UTC+3 (MSK+0)

Valdai (ven.: Валда́й) om Venäman lidn da lidnankund Uz'lidnan agjan suvipäivnouzmas. Se om Valdain rajonan administrativine keskuz.

Eländpunkt mainitase ezmäižen kerdan vl 1495 kuti Valdain selišš (ven.: Валдайское селище), nimitihe tahondan da järven mödhe. Žilo sai lidnan statusad vl 1770, sijazihe «Moskv — Piter»-traktal (nüg. M10-trass).

Valdai-lidn šingotase mašiništonsauvomižel (optiž-mehanine tegim^[1], pomptegim^[2]) i sömtegimištol (konservtegim^[3], leibäntegim).

Lidn sijadase ühtennimižen järven randan da ülüden päivlaskmas, 210 m ü.m.t. keskmäižel korktusel. Matkad Surhe Uz'lidnhasai om 130 km lodeheze orhal vai 140 km avtotedme. Lähembaižed lidnad oma Okulovk 44 km pohjoižpäivnouzmha orhal vai 66 km avtol i Bologoje (Tverin agj) 48 km päivnouzmha orhal vai 66 km M10-trassadme.

Zimogor'je-žilo (804 rist. vl 2016) mülüb lidnankundha Valdain ližaks. Lidnankundan pind — 28,41 km².

Vn 2010 Venäman rahvahanlugemižen mödhe lidnan eläjiden lugu oli 16 098 ristitud, lidnankundan — 16 983 ristitud, rajonan kaks' koumandest. Kaikiš suremb lidnan ristitišt oli enamba 19 tuh. eläjid vll 1989−1998 (19 800 rist. vl 1996). Vl 2017 kaik 14 379 ristitud elihe lidnas i 15 169 ristitud kaikes lidnankundas.

Ortodoksižen hristanuskondan kuz' pühäpertid^[4] oma saudud lidnas: Eläban Eziauguižen Stroican päjumalanpert' (vspäi 1744), nell' jumalanpertid i časoun'. Niiden ližaks Iverin Jumalanmaman jumalaižen Pühäjärven mez'jumalankodi om olmas vspäi 1653 järven sarel, kümnes kilometras lidnan keskusespäi avtotedme.

Valdain agrarine tehnikum^[5] om lidnan professionaližen opendusen aluzkundaks, enzne Valdain servisan da ohjandusen kolledž^[6] om mülütadud sihe vspäi 2017.

Lidnankundan pämez' om Deputatoiden nevondkundan ezimez'. Lidnankundan Administracii om likvidiruidud vn 2016 uhokus, sen jäl'gmäine pämez' oli Jurii Stade vn 2013 redukuspäi. Rajonan Administracii tegeb sen velgusidme.

• 
  Lidnan i rajonan administracii (2013)
• 
  Kelloiden muzei, ende ph. Jekaterina-moknikan jumalanpert', vn 2010 nägu
• 
  «Valdai»-adivpert' vl 2011
• 
  «Kristall»-sportkeskuz (2014)
• 
  Valdai-raudtestancijan sauvuz vl 2018

1. ↑ Optiž-mehanižen «Valdai»-konstruktorbüron sait (okbvalday.ru). (ven.)
2. ↑ Valdain mehanižen tegimen sait (vldmz.ru). (ven.)
3. ↑ Valdain konservtegimen sait (zaovalday.ru). (ven.)
4. ↑ Valdain pühäpertid sobory.ru-saital. (ven.)
5. ↑ Valdain agrarižen tehnikuman sait (agrartexvalday.ru). (ven.)
6. ↑ Enččen Valdain servisan da ohjandusen kolledžan sait (collegevalday.ru). (ven.)

• Lidnan Ezitajiden Nevondkundan oficialine sait (valday-gorod.ru). (ven.)
• Lidnankundan da rajonan ühthižen administracijan oficialine sait (valdayadm.ru). (ven.)

Valdai (lidn) Vikiaitas