Uz' Läl'

Uz' Läl'
Новая Ляля

Lidnanznam	Flag
Valdkund	Venäma
Eläjiden lugu (2023)	10,530 ristitud
Pind	20 km²
Pämez'	Sergei Bondarenko (reduku 2008—)
Telefonkod	+7−34 388-xx-xxx
Avtokod	66, 96, 196
Aigvö	UTC+5 (MSK+2)

Uz' Läl' (ven.: Но́вая Ля́ля) om Venäman lidn Sverdlovskan agjan päivlaskmas. Se om Uden Lälin lidnümbrikon (edel 2006. vot — rajonan) administrativine keskuz, mülüb sihe.

Eländpunktan aluz om pandud vl 1903 kuti Uz' Läl' -žilo (Vanh Läl'-žilo-ki om olmas), nimitihe jogen mödhe. Vspäi 1928 oli rajonan keskuseks. Žilo sai lidnan statusad vl 1938. Toižen mail'man sodan aigan patrontegim radoi lidnas.

Uz' Läl' šingotase Uden Lälin cellülozbumagaižel kombinatal^[1], mugažo mecižandusen edheotand i leibänkombinat ratas.

Lidn sijadase Läl'-jogen muugotil randoil (ven.: Ляля 258 km pitte, Sos'v-jogen oiged ližajogi, Obin hurapol'ne bassein), 100 m ü.m.t. keskmäižel korktusel.

Läl' -raudtestancii om «Alatagil — Serov»-keskustal, sijadase lidnan keskuses. Viž avtotesildad om saudud Läl'-joges päliči. Matkad Jekaterinburghasai om 246 km suvhe orhal, 290 km avtotedme vai raudtedme. Lähembaine lidn om Verhoturje 25 km suvipäivnouzmha orhal vai raudtel, 41 km avtol.

Klimat om ven kontinentaline vilu. Voden keskmäine lämuz om +0,6 C°. Ekstremumad oma −52,3 C° (tal'vku) i +38,4 C° (heinku). Paneb sadegid 522 mm vodes.

Vn 2010 Venäman rahvahanlugemižen mödhe lidnan eläjiden lugu oli 12 734 ristitud, lidnümbrikon viž ühesandest, vn 2021 — 10 684 ristitud. Kaik 11 947 eläjad oli lidnas vl 2017. Kaikiš suremb lidnan ristitišt oli 16..18 tuhad eläjad vll 1959−1979 (18 000 rist. vl 1967).

Rahvahad (2010, ozutadud rahvahudenke): venälaižed — 93,8 %, totarlaižed — 2,3 %, saksalaižed — 1,0 %, toižed rahvahad — 2,9 %.

Ortodoksižen hristanuskondan kaks' jumalanpertid^[2] oma saudud i avaitud Udes Läliš: Sündun Eläbzdusen (puine, saudihe vll 2001−2006) i Venäman uziden moknikoiden da hengenavaidamižen kundlijoiden (om letud türman territorijal vll 2015−2016). Islaman pühäpert' om avaitud lidnas vl 2019.

Lapsiden opendusen aluzkundad oma severz'-se päivkodid, koume keskškolad (nomer 1, 2, 4), lapsiden sädamižen Raduga-pert' («jumalanbembel'»), čomamahtoiden škol, lapsiden da norišton sportškol. Serovan politehnižen tehnikuman filial om lidnan professionaližen opendusen aluzkundaks.

1. ↑ Uden Lälin cellülozbumagaižen kombinatan sait (ncbz.ru). (ven.)
2. ↑ Uden Lälin pühäpertid sobory.ru-saital. (ven.)

• Uden Lälin lidnümbrikon tobmuden aluzkundoiden oficialine sait (ngo.midural.ru). (ven.)

Uz' Läl' Vikiaitas