Kaltan

Kaltan
Калтан

Lidnanznam	Flag
Valdkund	Venäma
Eläjiden lugu (2021)	21,752 ristitud
Pind	32,36 km²
Pämez'	Igor' Goldinov (tal'vku 2010—)
Telefonkod	+7−38 472-xx-xxx
Avtokod	42, 142
Aigvö	UTC+7 (MSK+4)

Kaltan (ven.: Калта́н) om Venäman lidn Kemerovon agjan suves. Se om lidn agjan alištusenke (vspäi 1993), om Kaltanan lidnümbrikon administrativižeks keskuseks da palaks.

Eländpunkt mainitase ezmäižen kerdan Tomskan gubernijan elänzoittud tahoiden nimikirjuteses vl 1859 kuti Kaltanskai-külä 128 eläjanke. Kätihe Alakaltan-küläd (ven.: деревня Нижний Калтан) radnikžiloks Kaltan-nimenke vl 1949. Se sai lidnan statusad vn 1959 29. päiväl heinkud. Kaltan-raudtestancii radab vspäi 1930.

Kaltan šingotase kivihilen samižel (kaks' kaivut) i Suvikuzbassan GRES:al kivihilenke poltuseks, sauvondmaterialiden edheotandoil (savičuntegim, metalližkonstrukcijad^[1]) i lämbituzmašiništon tegimel.

Kaltan sijadase Kondom-jogen oiktal randal tobjimalaz (ven.: Кондома, Obin oigedpol'ne bassein), 225 m ü.m.t. keskmäižel korktusel. Voib olda manrehkaidusid kudhe ballhasai. Kivihilen löudmižsijad sijadasoiš päivlaskmha lidnaspäi.

Matkad Kemerovohosai om 218 km lodeheze-pohjoižhe orhal, 258 km avtol vai raudtedme. Lähembaižed lidnad oma Osinniki kümnes kilometras pohjoižpäivnouzmha i Novokuzneck kaks'kümnes kilometras pohjoižhe orhal sen röunhasai.

Vn 2010 Venäman rahvahanlugemižen mödhe lidnan eläjiden lugu oli 21 892 ristitud, lidnümbrikon kaks' koumandest, vn 2021 — 21 752 ristitud. Kaik 20 947 eläjad oli lidnas vl 2017. Kaikiš suremb lidnan ristitišt oli 28 tuh. eläjid vl 1967.

Ortodoksižen hristanuskondan Jumalanmaman Katken pühäpert'^[2] om avaitud lidnas, saudihe vll 2002−2008.

Lapsiden opendusen aluzkundad oma kümne nimitadud i nomeruidud päivkodid (nomer 1, 2, 7, 10..12, 15, 24, 37, 38), koume aluzškolad (nomer 15, 18, 29), kaks' keskškolad (nomer 1, 30), čomamahtoiden škol (nomer 42), kompleksine sportškol. Kaltanan äiprofil'ne tehnikum^[3] om lidnan professionaližen opendusen aluzkundaks.

1. ↑ Kaltanan metalližkonstrukcijoiden tegimen sait (kaltan-kzmk.ru). (ven.)
2. ↑ Kaltanan pühäpertid sobory.ru-saital. (ven.)
3. ↑ Kaltanan äiprofil'žen tehnikuman sait (gpoukamt.ru). (ven.)

• Lidnümbrikon tobmuden sait (kaltan.net). (ven.)

Kaltan Vikiaitas