Sestièr
|
| Sestieri di Venezia: |
El sestièr el xe na de łe sie xone che łe divide ła sità de Venesia. El val come el quartièr de łe altre sità, chel raprexentava ła quarta parte del'acanpamento roman, schema ideal de ła costrusion de un gran nùmero de séntri abitai del'Europa.
Ła divixion sitadina in sestièri ła ghe xe fin da ła nàsita de Venesia. Ła numerasion sìvica ła xe ùnega par ogni sestièr, co qualche ecesion par xone più grande come łe ìxołe che no łe xe miga cołigae co pónti, e ła riva a nùmeri a quatro sifre. Sto particołar sistema de numerasion, asieme a ła natural conpresità de łe całe de Venesia, ła ga come conseguénsa che ghé xe, qualche volta, dó nùmeri sìvisi davèro desferénti anca se i xe bastansa visini.
I sestièri de Venesia i xe:
- Canarégio, ciamà cusì perché el xe stà tirà su in na xona pałudoxa indove ghe gera piena de canèi;
- Casteło, chel ga tólto el só nome da na fortésa ancuo descomparsa intórno a ła qual ła se ga formà l'àrea;
- Dorsoduro, pol darse che sto nome el se riferisa a łe sode dune de sabia de sto łógo qua;
- San Marco, el tol el nome da ła baxełega;
- San Poło, el tol el nome da ła Ceza de San Poło;
- Santa Cróxe, el più pìcoło, se no se consìdera anca el Troncheto e ła stasion.
Ste divixion qua no łe covre miga tuto el spasio del séntro stòrego de Venesia. Łe ìxołe de ła Giudeca łe fa parte de Dorsoduro, l'ìxoła de San Zorzi Mazor de San Marco e l'ìxola de San Michièl, in dove se cata el simitero sitadin, de Casteło.
Se parla de sestièri anca inte łe ìxołe de Buran e Pełestrina, anca se łe ga ła prima sinque e e l'altra quatro division.