Dehung

Rudan ku hari, stgesa ku bubu mu, klaun mu mesa, “Asi ka sklwiyan mbruwa ma sqyexan quyux, kika tnais ba qtaan mnheru kndalax dheran; kuxul ba skdiyan Seediq. Malu riyung shpure qsiya, mahun begu.” mesa. Saya de, pgmaxul daha camac ma siyang, sama mahun begu ma, hndure ka pskluwan daha mekan duri di.

Kndala ku naq slaqi saapa ku tama mu rudan musa neepah ma, musa lmiqu; seeban ku na pala pungu klaali, kanna ka di baki ma pai mu mssnegul. Meniq texal, musa knbgurah neepah ka dheya. Saapa ku tama mu rudan musa dmayang. Knbrawan ba ka bbrhengil msnegul kndkilan. Ani si, spooda na gamil truma smeqic, ini ku na shbliti peni.

Ya ani hari maxal daha kana ka di baki ma pai, knkkere ba musa tmatak dmayang. Ini geqi hida nana, knpruwan so ba eluw paru mtlibu ddaan ka gnnayang daha. Madis hlmadac ma kaqul ka statak daha.Sngayan daha ciida, mangal nngalan daha balung qbheni, beyuq walu ka sqdiyan ku daha. Mekan miyan hndayu hlama butur ka ceka naali; tena naq hnpure begu camac ka bubu rudan stuuman ppuqun, mtlubu miyan suupu mekan ido.

Wada mkteru hari ali ka tntakan daha, mbruwa paru ma mtqiliq paru ka karac bero bobo mnekan. Uxe ta mpdehuk alang, nugaaguh ta qduriq quri behing mkkesa mpplawa. Moda miyan eluw icil musa behing, knpruwan ba ka dehung, kana qelung ddaan mgnetun na tama rudan. Mqaras ba lmamu ka tama ruda. Pdooyan ku na yaku ka mntena ba trasi biciq qtaan ka kingal dehung, “Malu stuuman pure begu wa!” mesa.

Ini klai ka rudu tdiyung meniq ssiyo qhuni baro; bhangan ni hmrengang quri yami ka tama rudan. Ini klgelu mheyu ma, “Iya squwaq!” kesun ku na slhaling mrengo. Bsiyaq bale ka mnheyu miyan hiya; melux miyan maku mthedu snqyaxan qyux paru.

Dehuk miyan behing, ini klai wada tuting knuwan ka trasi na dehung; wano naq qmuru papak na ni mu dooyan di. Dehuk ku rudan hari de, stgesa ku bubu mu, klaun mesa asi ka mbruwa sqyexan kika tnais ba qtaan mdakil ka dehung.Kuxul ba skdiyan daha shpure tuuman begu. Trumaan ku bubu ma yuxan na ku lukus mu mhuriq. Pmahan ku begu camac gnmaxan papak dehung dnoi mu. Mttilux hei ma ma ini ku tgkela mtaqi di mesa.

中文維基百科 https://zh.wikipedia.org/wiki/%E9%9B%9E%E8%82%89%E7%B5%B2%E8%8F%87

Robo Walis(母), Lubi Pawan(伯母), Habo Mangis(堂姊), Dakis Pawan ka smneeru

Aking Nawi smnnetur matis