Kupheka kushiwo kusebentisa kushisa kulungisa kudla lokutawudliwa nasekuvutsiwe.

Tintsatfu tindlela tekupheka letikhona:

1. Kupheka ngetingeleti,
2. Kupheka ngemafutsa,
3. Kupheka ngekufutsetela.

Ingeleti (liquid) kushiwo intfo legeletako, lengenaso simo sinye sekwakheka, kepha lehlangene ekugeleteni kwayo, njengemanti nawoyela.

Tingeleti letisebenta kakhulu nakuphekwa ngemanti, umsobho, neliwayini.

Kudludlisa kushiwo kwenya loko lokuphekako engeletini, kungaba ngemanti, umsobho noma liwayini, ukubeke emlilweni kudzimate kubile, kutsi noma sekubila ukuyeke njalo kudzimate kuvutfwe ngendlela lofuna ngayo.

Tibonelo tekudla lokuphekwa ngekudludliswa:

1. Lisobho,
2. Inyama,
3. Ematabhane,
4. Bhatata,
5. Ematsaphu,
6. Emacandza.

Kufutfutisa kushiwo kwenya loko lokuphekako engeletini, ukubeke emlilweni, kepha kungabili ngoba lizingakushisa ulibeke ngephasi kwema-Celcius lali-100. Loko kwenta kutsi ingeleti ingabili, lokuphekwako kuvutfwiswe kushisa nje kwengeleti.

Konkhe lokudludliswako kungaphindze kufutfutiswe futsi.

Emafutsa ekupheka (cooking oil) kushiwo emafutsa lentiwa ngelimila, emafutsa esilwane, noma layingeleti, lasetjentiselwa kupheka.

Kupheka ngemafutsa kutsiwa kuhlohlotisa (fry), kusuke loko lokuphekwako kwenyiwe emafutseni ekupheka lashisako, kuhlohlote kudzimate kuvutfwe. Kuyelana ngeluhlobo lwekudla lokuhlohlotiswako. Kulokunye atselwa abe mancane emafutsa kwentelwe kwekutsi atsambise lokuphekwako nekutsi kunganamatseli ebhodweni. Kulokunye ayatselwa emafutsa agcwalise libhodo, lolokuphekwako kutowenyiwa kusitsele.

Tibonelo tekudla lokuphekwe ngekuhlohlotiswa:

1. Inyama,
2. Ematabhane,
3. Imibhidvo.

Kupheka ngekufutsetela kushiwo kupheka ngekusebentisa kushisa kuphela, kungasetjentiswa manti namafutsa ekupheka. Loku kwentiwa ngekufaka loko lokuphekwako ehhavini lelishisako, nome ngekukubeka kusondzelane nekushisa kwemlilo kumbe emalahle.

Tintsatfu tindlela tekupheka ngekufutsetela: kubhaka, kosa, nekugayinga.

Kubhaka yindlela yekupheka lapho khona kusetjentiswa kushisa kwelihhavu. Esikhatsini lesinyenti kuvamise kubhakwa inhlama kwentiwe kudla lokufana nemakhekhe, emakuku, nemabhanisi.

Kugayinga yindlela yekupheka lapho khona kusetjentiswa kushisa kwelibhodo kuphela, kungafakwa manti namafutsa. Loko lokuphekwako kugocotiswa epanini noma ebhodweni lelishisako kudzimate kuvutfwe.

Kudla lokugayingwako kufaka ekhatsi emantongomane, nembasha.

Kosa yindlela yekupheka lapho khona kusetjentiswa kushisa kwemlilo, emalahle, nelihhavu kuloko lokuphekwako, lokungasiyo inhlama. Uma kosiwa ngemlilo loko lokosiwako kubekwa kuhlangane nekushisa. Uma kosiwa ngelihhavu loko lokosiwako kuvalelwa ehhavini lelishisako. Kuvamisa esikhatsini lesinyenti kuba yinyama leyosiwako.