Sankt Georg

Legendene fortel at Georg fødd i Kappadokia i Vesleasia av kristne foreldre, og var offiser i den romerske hæren. Ifølgje Jacobus de Voragines legendesamling Legenda aurea (Gylne legender) reiste Georg til Libya, der ein drake heldt til. Draken kravde dagleg å få eta ei ung jente som skulle veljast ved loddtrekking. Til slutt blei den einaste dottera til kongen vald ut. Men ved Kristi hjelp klarte Georg å slå draken og setja prinsessa fri. Draken følgde lydig etter prinsessa etter at han blei såra i kampen med Georg. Kongen og befolkninga omvende seg til kristendommen, og Georg drap draken. Dette er eit symbol på Sankt Georgs kamp mot det onde, og det skildrar òg korleis Sankt Georg verkar for det gode.

Ifølgje tradisjonen skal Georg ha blitt drepen som martyr under keisar Diokletians kristenforfølging rett etter år 300. Etter at Georg både hadde blitt freista kokt, brend og knust under hjul utan at det beit på han, blei han til slutt halshoggen.

Sankt Georg var vernehelgen (skytshelgen) for dei spedalske, og mange hospital for spedalske i mellomalderen fekk namn etter han, til dømes Sankt Jørgens Hospital i Bergen.

Sankt Georg er òg speidaranes skytshelgen. Speidarane fornyar speidarløftet den 23. april, for å minnast dagen Sankt Georg døydde.

• Georgkulten
• Sankt Jørgens dag
• historia til kristendommen
• kyrkjehistorie
• helgen