Knut Magne Flølo er tidlegare ordførar i Vestnes kommune og tidlegare møtande vararepresentant for Framstegspartiet (FrP) frå Møre og Romsdal. Han var fast møtande som representant for landbruks- og matminister Jon Georg Dale.
Knut Magne Flølo
Faktaboks
Knut Magne Flølo
- Fødd
- 18. november 1949, Vestnes, Møre og Romsdal
Bakgrunn
Knut Magne Flølo er fødd i Vestnes i Møre og Romsdal. Han er utdanna elektrikar, og han arbeidde i mange år med mekling for skipsreiarar, som dagleg leiar av firmaet Sanab-Branch Office.
Politisk karriere
Flølo har vore aktiv FrP-politikar sidan han melde seg inn i partiet i slutten av 1970-åra. Etter nokre år ute av politikken blei han vald til ordførar i Vestnes kommune for perioden 2003–2007, ved direkteval. Flølo blei med det den første FrP-ordføraren i fylket. Han har vore vald til kommunestyrerepresentant for FrP i Vestnes i periodane 2003 til 2019 og har òg hatt fleire periodar i fylkestinget i Møre og Romsdal.
Flølo møtte fast på Stortinget for Jon Georg Dale for Framstegspartiet frå Møre og Romsdal i 2017–2018 og i 2019–2020. På Stortinget var han medlem av finanskomiteen og av helse- og omsorgskomiteen. Politisk har han vore særleg oppteken av å gi næringslivet betre rammevilkår, for få bort formueskatten og for å investere i infrastruktur.
Andre verv
Flølo har hatt fleire administrative verv og tillitsverv. Han er medlem i styret for Norsk Tindesenter, medlem av styret for miljøselskapet ÅRIM, nestleiar i Vestnes Energi AS og styreleiar i Sameiet Trappeskolen 1. Han har tidlegare vore styremedlem i Tremek AS og i Vestnes Næringsforum.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.