Francu Udella

Francu Udella (Casteddu, 25 de frearzu de 1947) est unu puzile antigu sardu.

Aiat tentu una carrera longa e òtima intre sos amadores, in ue fiat abarradu finas a s'agabu de su 1972, a pustis de rapresentare s'Itàlia, in su matessi annu, in sos Zogos Olìmpigos de Mònagu de Bavària in sa categoria de sos pesos musca. In su 1968, aiat leadu parte a sos Zogos de Tzidade de su Mèssigu in sos pesos musca, in onzi manera ambas partetzipaduras fiant terminadas in sas primas rundas. Fiat istadu prus bias campione italianu e aiat bestidu 38 bias sa màllia asula. Aiat cuncruìdu sa carrera amadoriale cun 140 bintòrias subra de 147 addòvios disputados.

Pustis coladu a su profissionalismu a sos 25 annos, relativamente a tardu, aiat cumbatidu pro 18 bias in 2 annos e, su 20 de triulas de 1974, aiat tentu s'oportunidade de lograre su tìtulu mundiale WBC, peroe in Lignano Sabbiadoro fiat istadu derrotadu pro KO in sa de deghe pasias dae Betulio González su campione benetzuelanu. Belle gasi, tres meses a pustis ebia, non si nche fiat dassadu fuìre sa possibilidade de si fagher campione europeu, derrotende in Milanu a Pedro Molledo s'ispannolu pro nocàutu in sa de chimbe pasias.

In s'abrile de s'annu in fatu, torra in Milanu in s'istàdiu de San Siro, aiat cumbatidu in sa categoria nounàschida de sos pesos minimusca e, binchende pro iscalifigadura a Martinez su benetzuelanu, fiat devènnidu campione mundiale pro sa WBC. Sende gasi, pagos meses a pustis su tìtulu mundiale li fiat istadu sustraìdu a mesa tabachina pro neghe de una farta de defesa contra a su disafiadore ufissiale. A pustis de pagos meses, in su triulas de 1976, Udella aiat tentu s'ocasione de torrare a otenner su tìtulu mundiale, peroe in Caracas fiat istadu derrotadu dae Luis Istaba su benetzuelanu pro KO in sa de tres pasias.

Pustis postas a bandas sas ambissiones mundiales, su bossadore sardu aiat sighidu a cumbater in sa categoria de sos musca, in sa cale aiat mantentu su tìtulu europeu in s'ìnteri. Aiat defèndidu repetidamente su tìtulu europeu finas a s'1 de maju de 1979, addaghi in Londra fiat istadu bìnchidu craramente peri puntos dae Charlie Magri s'ingresu. A pustis de cussa derrota, Udella, chi oramài teniat trintaduos annos, non aiat prus agatadu sos istìmulos pro torrare a su cuadradu e aiat postu agabu a sa carrera sua longa.