Ловар на єленї (филм зоз 1978)

Ловар на єленї
Роберт де Ниро (улога главного ґлумца: Майкл Вронски)
Режия	Майкл Чимино
Сценарио	Дерик Вошберн по филмскей приповедки Вошберна, Квина К. Редекера, Луиса Гарфинкла и Майкла Чимина
Продуцент	Бари Спајкингс Мајкл Дили Мајкл Чимино
Главни улоги	Роберт де Ниро Кристофер Вокен Мерил Стрип Џон Казале Џон Севиџ Ејми Рајт
Продуцентска хижа	Universal Pictures
Рок	1978.
Тирванє	184 минути
Жем	ЗАД
Язик	анґлийски русински виєтнамски французки
Буджет	15 милиони долари
Заробок	49 милиони долари
IMDb вяза

Ловар на єленї (анґл. The Deer Hunter) америцки войнови филм зоз 1978. року, режирал го Майкл Чимино и у нїм приказани приповедки зоз живота русинско – америцких роботнїкох у желєзарнї и їх служенє войска под час Виєтнамскей войни. Главни улоги бавя: Роберт де Ниро, Кристофер Вокен, Джон Севидж, Джон Казале, Мерил Стрип и Джордж Зундза. Приповедка филма ше одвива у Клертону, малим индустрийним городзе при рики Мононґагила, южно од Питсбурґу, потим у Виєтнаму и на самим концу филма у Сайґонє под час Виєтнамскей войни.

Филм часточно базовани на сценарию о русийским рулету автора Луиса Ґарфинкла и Квина К. Редекера хтори нє бул нїґда продуцировани а наволани є Чловек хтори ше пришол бавиц. Продуцент филма Майкл Дили, пренашол сценарио, поєднал сценаристу/режисера Майкла Чимина, хтори вєдно зоз Дериком Вошберном вименєли текст хаснуюци елементи русийского рулету у збуваньох у Виєтнамскей войни. Знїманє филма нє прешло без почежкосцох прето же прекрочели задумани пенєжни средства и розпорядок знїманя; филм по законченю знїманя коштал 15 милиони долари. Под час приказованя филма у кинох, сцени зоз русийским рулетом були тримани як барз контроверзни.

Филм номиновани за дзевец награди Оскар, а достал пейц: за найлєпши филм, найлєпшого режисера (Чимино), найлєпшого побочного ґлумца (Вокен), найлєпши микс звука и найлєпше монтиранє. Зоз тим филмом Мерил Стрип була першираз номинована за награду Оскар (за найлєпшу побочну ґлумицу). Америцки филмски институт положел филм на 53. место на лїстини найлєпших америцких филмох. Конґресна библиотека 1996. року вибрала тот филм же би ше го чувало у Националним реґистру филмох як „културно, историйно або естетски значни”.

У Клертону, малим индустрийним городзе у заходней часци америцкей держави Пенсилваниї у другей половки 1967. року, пребуваю и робя у желєзарнї роботнїки по походзеню Руснаци. Майкл „Майк” Вронски, Стивен Пушков и Никанор „Ник” Чевотаревич зоз помоцу своїх товаришох и колеґох, Стена и Питера „Аксела” Акселрода и власнїка карчми Джона Велша ше пририхтую за наиходзаци два вельки подїї, а то Стивеново винчанє и одход товаришох до войска.

У уводних сценох филма упознаваме трох главних ґлумцох – Майка, озбильного, алє скромного вожда; Стивена, сердечного млодия и Ника, цихого, поцагнутого леґиня хтори люби пойсц до ловох на єленї пре „древа”. У тей часци филма ше стретаме и зоз Майкову филозофию „єдного вистрелу ” – зоз филозофию спрам хторей Майк люби ловиц єленї (забиц их зоз єдну кульку). Скорей як цо вони троме пойду до Виєтнаму на служенє войска Стивен и його дзивка Андєла (хтора ваготна зоз другим чловеком, алє ю Стивен, и попри того, люби) ступаю до малженства у русийскей православней церкви. У медзичаше, дознаваме же Майк ма прикрити романтични чувства ґу Линди, Никовей дзивки.

Свадзебне вешелє ше отримує у карчми (локация знїманя у Lemko Hall у Кливленду, Огайо) так же госци пошвидко пияни, танцую, шпиваю и крашнє ше препровадзую (медзи статистами хтори поволани на знїманє филма були и русински имиґранти). У єдней хвильки Майк, Ник и Стивен обачели же на свадзбу пришол и член америцких специялних воєних єдинкох. Майк му купує пице и розпочина розгварку зоз нїм же би дознал вецей о войни у Виєтнаме, алє го вояк иґнорує. Майк му потолковал же вон, Стивен и Ник одходза до Виєтнаму, а член Желєних береткох дзвига руку зоз погаром до висока и наздравел з „єби ґа”. Пошвидко тот вояк ознова подзвигнул погар и гласно наздравел з истима словами.

Майка приятелє застановели же би нє пришло до битки и вон ше враца за стол и видрижнююци ше дзвига погар до висока, наздравя воякови з истим лацом. Вояк ше на ньго з горкосцу ошмихнул. Стивен и Андєла на свадзби пию вино зоз истого погара, а у складзе з народним вереньом же кед зразу випию вино зоз погара без розлїваня, буду щешлїви до конца живота. Заш лєм, єдна капка червеного вина хтору нїхто нє обачел, пада на винчанїцу и на тот способ мож предпоставиц як ше подїї буду одвивац.

Линда лапа букет квеца хтори руцела Андєла, а Ник ю такой спитал цо вона прилапела. Познєйше, того вечара, пияни Майк бега по городзе подполно голи. Ник го здоганя и модлї же би го нє охабел „там” кед ше му дацо „подле” случи. Шлїдуюцого дня Майк, Ник, Стенли, Джон и Аксел одходза на лови на єленї остатнїраз и Майк забива єленя зоз „єдну кульку”.

Надалєй ше збуваня у филме одвиваю у з войну руйнованим валалє хтори надлєтує америцки геликоптер понеже є окупироване з боку комунистох. Вояк Сиверного Виєтнама руца бомбу до склонїща хторе преполне зоз жительством. Майк, хтори бул у нєсвидомосци, приходзи ґу себе и видзи вояка хтори забива жену зоз дзецком на рукох. Же би их вимсцел забива вояка зоз руцачом пламеня. У медзичаше зоз геликоптера виходза даскельо припаднїки америцкей пешадиї медзи хторима Ник и Стивен. Майк, Ник и Стивен ше нєсподзивано стретаю алє их такой Виєтнамци зарабровали и зоз другима зараброванима америцкима вояками и вояками Южного Виєтнама одведли до воєного лаґру при рики.

Же би им нє було допито, садистични чуваре наганяю зараброваних же би бавели русийски рулет при тим ше ставяци же хто прежиє а хто нє.

Троме товарише примушени бавиц єден процив другого. Стивен бави процив Майка хтори му дава моралну потримовку алє вон траци нерви и контролу над пиштольом так же себе калїчи главу. Чуваре одредзую кару Стивенови и завераю го до подводней клїтки хтора полна зоз патканями и мертвима целами тих цо дожили исту судьбу як и вон. Ник и Майк заєдницки забиваю чуварох и ошлєбодзую Стивена. Сцекаю тримаюци ше за стебло древа плїваюци по рики. Нєсподзивано наиходзи америцки геликоптер, алє ше лєм Никови поспишело войсц до ньго. Ослабени Стивен випадує зоз геликоптера назад до рики и Майк ше, нароком, руца за нїм же би го виратовал и нє охабел. Стивеново ноги поламани и Майк му помага ношаци го на ґринґох же би през джунґлу дошли ґу союзнїком. Стретаю колону жительох хтори сцекаю зоз войновей обласци и Майк уруцел покалїченого Стивена на камион Южних Виєтнамцох наздаваюци ше же му помогню.

За тот час, психично и физично вислабени Ник на лїченю у шпиталю у Сайґонє, нє знаюци цо ше случело зоз його товаришами. После виходу зоз шпиталю, безцильно блука по городзе и стрета француза Джулиєна Ґринда, хтори приятельски розположени, а хтори ше находзи опрез просториї у хторей ше бави русийски рулет. Ґринда нагваря безвольного Ника же би участвовал у тим бависку и одводзи го до хижи. Нука ше находзи Майка хтори провадзи бависко алє го Майк нє обачел. Ник почина бавиц, бере пиштоль од єдного учашнїка, штреля до ньго и до себе и так виволує нємир при патрачох пре претаргованє бависка. Ник и Ґринда сцекаю у автомобилу нє похопююци же их Майк, у тим галайку, доволує.

Майк ше враца до ЗАД, алє одлучує же ше нє будзє зявйовац у явносци, так же совитує таксисту хтори го веже дому най прейдзе коло його хижи бо му барз нєприємно яке му вешелє пририхтали Линда и товарише. Познєйше нащивює Линду и зблїжує ше зоз ню алє лєм прето же обидвойо думаю же страцели заєднїцкого товариша.

Майк одходзи на лови зоз Акселом, Джоном и Стеном, и кед наишли на єленя вон штреля „єдну кульку” до воздуху и єлень сцека. Шеда на камень и кричи „ОК?”, чує ше вецейнїсти одгук и теди патраче филма свидоми його менталного здравя як пошлїдок утрати товаришох Стивена и Ника. Врацаю ше до колїби дзе ше Стен хвалї и преказує зоз новим пиштольом. Майк ґрабе пиштоль од нього и упера му го до глави нє знаюци же є наполнєти. Нєодлуга Майк нащивює Стивена у шпиталю хторому одрезани обидва ноги и дознава же Стивенови хтошка зоз Сайґону посила вельки суми пенєжу. Майк прешвечени же Стивенови пенєж сцигує од Ника.

Майк ше врацел до Сайґону дзе пренаходзи Ґринду хтори ше у медзичаше збогацел бавяци русийски рулет праве прето же ше ставял на Ника. Ґринда го одводзи ґу Никови до полней хижи у хторей ше бави бависко. Майк ше уключує до бависка праве процив Ника наздаваюци ше же го Ник препозна и же ше вєдно враца дому. Майк лапа Ника за руку же би нє штрелєл до себе и обачує же му руки прекрити зоз ранами (нагадуєме же хаснує героин). У остатнєй хвильки Ник препознава Майка и ошмихує ше му, виповеда слова „єдна кулька”, кладзе руку зоз пиштольом ґу своєй глави, штреля и забива ше.

У ЗАД ше 1975. року отримує Никово ��ованє, хторого Майк принєсол дому и на таки способ отримал обецунку же го нє охаби. Филм ше закончує зоз сцену у хторей ше товарише зишли у Джоновей карчми, шпиваю писню Боже, благослов Америку и наздравяю покойному Никови.

Медзи писнями у филму мож чуц и тоти два:

♦ Под час винчаня и вешеля ше чує Слава - традицийна писня русийскей церкви и Катюша - русийска народна писня

♦ Под час хованя ше чує русинска писня Вичная памят

• Ловац на јелене Imdb.com

• „The 51st Academy Awards (1978) Nominees and Winners”oscar.org

• filmsite.org

filmsite