Крижма

Крижма дарунок (звич. биле платно) хтори кума (кресна мац) купує дзецку за кресцини (карп.укр./бойк. крыжма „исте”, поль. krzyżmo „исте”, чес. křižmo „швецени обрядни олєй”; од лат. Chrizma).

Дараз крижма була лєм звичайне биле плаценко завязане на криж з билу машлю. Биле платно ше куповало як символ чистоти дзецка хторе ше кресци праве же би було очисцене од первородного гриху хтори нашлїдзує од своїх родичох. Платна було два метери, же би ше з нього могло познєйше ушиц дзивчецу сукенку, а хлапцови кошульку. Познєйше ше як крижму куповало крешнятку готови били шматки за мали дзеци, звичайно штрикани. Нєшка єст жени цо крижми украшую так же два метери билого платна (звичайно сатену) окруца на картон, завяжу з машлю на криж, а вец по нїм пришиваю били украси – платняни ружички, пацерки, бисери итд.

Святе потвердзенє, кризма або святе помазанє то обряд у велїх християнских церквох: у католїцких (Римо-, Греко- и Восточних католїцких церквох), православних и у Анґликанскей церкви святе потвердзенє єден зоз сакраментох (Святих тайнох).

У Грекокатолїцкей церкви ше обяд кресценя и миропомазаня окончує у истим чаше, а у Римокатолїцкей кресценє и кризма оддвоєни (кризманє ше окончує после 11 рокох живота дзцка). Кризма ма мено пре свой важни обряд – помазанє зоз святим олєйом (кризму) хтори пошвецени на Вельки (Желєни штварток), а даєдни народи ю волаю потвердзенє, понеже потвердзує и змоцнює милосц кресценя.

Нашо слово крижма то били шматки або биле плаценко, а пришло до нашого язика з латинского – Chrizma, хторе значи святи олєй.

Словнїк руского народного язика I, А – Н, Нови Сад 2017, б. 646.

• КРИЖМА- символ чистоти дзецка на кресценю Маковчань, Ютюб, www.youtube.com, 28. май 2017.

• Što krizma jest, a što nije?

• Krizma, Hrvatska ktolička misija. Düsseldorf, hkmduesseldorf.de

• Sveta potvrda. Vikipedija na hrvatskom jeziku, hr.wikipedia.org, 19. veljače 2005.