Politécnich ëd Turin

Ant ël 1859 a-i nass a Turin la Scòla d'aplicassion për j'anginié, andoa ch'as mostro ëd cors técnich a livel universitari, al Castel dël Valentin.
Ant ël 1906 la Scòla a dventa Real Politécnich ëd Turin, con na sede ëdcò an contrà dl'Ospidal (andoa ancheuj a-i é piassa Valdo Fusi) fin-a a che costa a l'é crasà dal bombardament aleà dl'8 dë dzèmber dël 1942.
Ël 5 ëd novèmber dël 1958 a l'é inaogurà l'edifissi ëd cors Duca dj'Abruss (anté che prima a-i era lë stadi), ch'a òspita l'aministrassion e la pì part dij cors d'angegnerìa (antramentre coj d'architetura a son restà part al Valentin, part ant le sale ëd contrà Boggio).

Al di d'ancheuj al Politécnich a-i son 18 dipartiment e 5 facoltà (3 d'angegnerìa e 2 d'architetura). An dzorpì che a Turin (andoa da banda dle doe sede stòriche as ten-o ëdcò cors al Lingòt e a l'Alenia), a-i son dle scòle dëstacà a Biela, Ivrèja, Lissandria, Ël Mondvì e Véres.
A travajo al Politécnich 259 professor ordinari e strasordinari, 246 professor associà, 362 tra arsercator, assistent e ancarià.
A conta apopré 26000 student, dont 629 dotorand.

• Pietro Enrico Brunelli (1945-1947)
• Eligio Perucca (1947-1955)
• Antonio Capetti (1955-1970)
• Rolando Rigamonti (1970-1981)
• Lelio Stragiotti (1981-1987)
• Rodolfo Zich (1987-2001)
• Giovanni Del Tin (2001-2005)
• Francesco Profumo (2005-2012)
• Marco Gilli (dal 2012)

• Sit Ofissial
• Portal dla Didàtica
• Laboratòri LabInf