Naviri frigorific

Un naviri frigorific es un naviri destinat au transpòrt de denadas periblas que necessitan una certana refrigeracion (fruchs, carn... etc.). Son dotats d'una velocitat auta per redurre la durada dau transpòrt e de divèrsei sistèmas de refrigeracion.

Lo premier naviri frigorific foguèt inventat en 1876 per l'engenhaire francés Charles Tellier (1828-1913) per lo transpòrt de carn entre Argentina e França. Après de melhoraments regardant lei sistèmas de de refrigeracion, en particular ambé lo passatge de l'èter dimetilic au dioxid de carbòni pus eficaç, aqueu tipe de naviri se desvolopèt e 350 èran en servici a la fin dau sègle XIX.

Au sègle seguent, conoguèron una expansion fòrta gràcias a la creissença dau mercat dei fruchs tropicaus. Puei, dins lo corrent dei doas guèrras mondialas, recebèron divèrsei melhoraments suplementaris car èran fòrça importants per transpòrter l'avitalhament dei tropas. Ansin, après la Segonda Guèrra Mondiala, la fusta utilizada per l'isolacion foguèt sistematicament remplaçada per la lana de veire. En mai d'aquò, la talha e la velocitat dei naviris aumentèron pauc a pauc. Dins lo corrent deis annadas 1960 e 1970, lo naviri frigorific conoguèt son apogèu e foguèt de còps utilizat per assegurar de crosiera de luxe.

Pasmens, dempuei la fin deis annadas 1970, aqueu naviri es vengut pus rar en causa de l'aparicion dau conteneire refrigerat que presenta d'avantatges importants en matèria de manutencion e que necessita pas la preséncia d'un naviri dotat de sistèmas complèxs de refrigeracion. Pasmens, entre 1 100 e 1 200 èran totjorn en servici en 2000 car son totjorn fòrça practics per certanei tipes de transpòrt. Tres tipes principaus existisson que lei pòrtaconteneires refrigerats que son especializats dins lo transpòrt de conteneires refrigerats, lei transportaires de suc dotats de cistèrnas refrigeradas e lei naviris frigorifics « classics » que son destinats au transpòrt de pes, de produchs en sòrta (fruchs... etc.) e de paletas.

• 
  Naviri frigorific
• 
  Seccion transversala
• 
  Vista interiora