Micolau Sabòli

Micolau Sabòli (Monteus, 30 de genier de 1614–Avinhon, 25 de julhet de 1675; en francés Nicolas Saboly) foguèt un poèta occitan de Provença, fòrça popular gràcias a sei nadaus.

Biografia

Micolau Sabòli èra fiu de Joan Sabòli, un mercadier borgés. Faguèt seis estudis en cò dei jesuistas d'Avinhon e leis acabèt au collègi de Carpentràs. Venguèt puei capelan e en 1633 rector de la capelariá de Santa Maria Magdalena a la catedrala de Sant Sufren. De 1640 a 1643 foguèt mèstre de capèla a la catedrala dins aquela vila, puei s'enanèt a Arle, Nimes e finalament Avinhon.

Sa fama de musician e de poèta se bastiguèt rapidament: escriguèt de messas, de motets e de nadaus que se publiquèron, tre 1669, en quasernets de sièis, uech o dotze, que sei compatriòtas leis aculhissián amb grand plaser e estrambòrd.

Quand se moriguèt a sei 61 ans, l'enterrèron dins lo còr de la glèisa de Sant Pèire d'Avinhon e uei encara s'i pòt veire una placa commemorativa de marbre d'aqueu personatge fòrça important per lei tradicions popularas occitanas.

Lei melodias dau poèta aurián probablament desaparegut se Francés Seguin leis aguèsse pas estampadas a la fin dau sègle XIX après vint ans de recèrcas.

Frederic Mistral escriguèt lei paraulas de la Copa Santa, sus una musica de Sabòli.

Sei nadaus son encara populars uei e an fach l'objècte de publicacions e enregistraments divèrs. Son interpretats actualament per lo Duo Calendau, interpretaire de musica tradicionala provençala. Se faguèt tanben un festenau Sabòli dins la vila de naissença dau poèta e musician en 2003.