Corbièras (region)

Pels articles omonims, vejatz Corbièras.

Corbièras

Tipe	Serrada e region naturala de França
Localizacion
Estat	França
Unitat administrativa	Aude e Pirenèus Orientals
Serrada	Pirenèus
Donadas
Altitud	1 230 m
Punt culminant	Puèg de Bugarag
Material	Ròca sedimentària

Las Corbièras o Corbièiras (en catalan: les Corberes; en francés: les Corbières) son una region naturala situada al limit de Lengadòc (Occitània) e de Rosselhon (Païses Catalans). La partida nòrd forma un parçan occitan^[1] e la partida sud una soscomarca de Rosselhon. La vila principala occitana n'es Lesinhan de las Corbièras.

La region de las Corbièras comença a l'estanh de Leucata per s'acabar a costat de Carcassona. Al nòrd, las Corbièras son separadas de Menerbés per lo flume d'Aude. Lo punt mai naut de las Corbièras es lo puèg de Bugarag (1230 m). Las Corbièras son constituidas en majoritat de sèrres calcaris de 400 m a 500 m d'altitud amb una vegetacion rara. Aquela region es coneguda per son vin (vin de las Corbièras).

Lo toponim Corbièras ven de la racina prelatina kor/kar, tipica dels noms de montanha (una legenda populara mas inexacta ditz que vendriá del nom d'aucèl, lo còrb).^{[cal referéncia]} A l'Atge Mejan, la region s'apelava en latin Vallis Corbaria.^[2]
L'abat Savartés fornís d'atestacions, sonque per La Corbièra, definida coma la partida meridionala del Pagus Narbonensis e una subdivision de Termenés (cantons actuals de Sijan, Durban, una partida dels de Lesinhan e de La Grassa), non pas per l'ensemble de las Corbièras, region montanhosa. Pel primièr sens, donc, las atestacions son : Vallis Corbaria al sègle VIII, In Corberia en 1271, In Corbaria en 1274, In tota Corbeiria en 1280, Terra Corbarie..., Corberie en 1360, Vicarius in Corbaria et in Termenesio en 1275, Vicarius Corbariae en 1302 (viguièr, representant de l'arquevesque de Narbona), Archidiaconus Corbariensis (archidiague, qu'a succedit al viguièr), Basse Courbière en 1526, Haulte Courbière en 1528 (subdivisions de la diocèsi civila per l'entreten dels camins)^[3].
Segon Dauzat, le mot Corbièra(s) ven del latin *corb-aria, per corv-aria, lòc trevat pels còrbs^[4].
Segon Jacques Astor, an supausat una raiç oronimica preindoeuropèa *kor-b, barrejada ambe'l latin corvus, « còrb », per explicar Corbièra(s). En realitat, aquela ipotèsi a de valor sonque per qualques cases e corbièra, demorança dels còrbs, permet d'explicar las Corbièras, perqué aquelis aucèls aiman las auturas rocassosas ^[5].

• Lengadòc : Lesinhan de las Corbièras, Portèl de las Corbièras, La Grassa, Durban de las Corbièras, Tuissan.
• Rosselhon : Òpol i Perellós, Vingrau, Estagell, Talteüll (Tautavel).

• Talteüll: Cauna de l'Aragó, sit preïstòric de l'Òme de Talteüll (-450 000)
• Castèl de Pèirapertusa
• Castèl de Querbús

• Corbièras : Istòria(s) de frontièras- Occitanica eAnem / CIRDOC
• Corbièras : Querbús - Occitanica eAnem / CIRDOC

1. ↑ Segon la classificacion dels parçans de Frederic Zégierman
2. ↑ Bénédicte et Jean-Jacques Fénié, Toponymie occitane, Sud-Ouest Université, 1997, 126 paginas, (ISBN 2879012155)
3. ↑ Abbé Sabarthès, Dictionnaire topographique du département de l'Aude, 1912, p. 100 legir en linha https://gallica.bnf.fr/ark:/12148/bpt6k110095d/f192.item.texteImage
4. ↑ Albert Dauzat, Charles Rostaing, Dictionnaire étymologique des Noms de Lieux en France, Librairie Guénégaud, reedicion 1984, p. 210, a Corbère
5. ↑ Jacques Astor, Dictionnaire des Noms de Familles et Noms de Lieux du Midi de la France, éditions du Beffroi, p. 257-258

• Portal de Lengadòc