My Boy

«My Boy» er ein song frå 1971. Musikken vart komponert av Jean-Pierre Bourtayre og Claude François, og teksten omsett frå den franske originalversjonen «Parce que je t'aime, mon enfant» til engelsk av Phil Coulter og Bill Martin.

Songen vert sungen i førsteperson frå synspunktet frå ein far til sonen sin, som tenkjer at guten søv og ikkje kan høyre kva faren seier til han. Faren fortel sanninga om det spente forholdet mellom faren og mora, og at alt faren har att er kjærleiken til sonen. I staden for å risikere ei smertefull skilsmisse, vel faren å bli verande i eit kjærleikslaust ekteskap for barnet sitt.

Skodespelaren Richard Harris framførte songen «My Boy» i ein musikkonkurranse sponsa av Radio Luxembourg i 1971. Trass i at han ikkje vann konkurransen, spelte Harris han inn og gav han ut på singel seinare det året. Songen kom ut på Harris-albumet med same namn og nådde 41. plassen på Billboard pop-lista og 13. plassen på Billboard adult contemporary-lista.^[1]

Elvis Presley spelte inn ein versjon av «My Boy» seint i 1973 og gav han ut i 1974 på albumet Good Times. Presley-versjonen av songen nådde 20. plassen på Billboard pop-lista,^[2] og låg ei veke på toppen av Billboard adult contemporary-lista i april 1975.^[1] «My Boy» nådde òg 14. plassen på Billboard country-lista.^[3]

• Heile songteksten på MetroLyrics