Martha Vickers

Martha Vickers
Fødd	28. mai 1925
Fødestad	Ann Arbor
Død	2. november 1971 (46 år)
Dødsstad	Hollywood
Fødenamn	Martha MacVicar
Aktive år	1943–1960
Verka som	skodespelar, fjernsynsskodespelar, modell, filmskodespelar
Ektefelle	A.C. Lyles (1948–1949) Mickey Rooney (1949–1951) Manuel Rojas (1954–1965)
Born	Maria Christina Rojas, Marta Teresa Rojas, Teddy Rooney

Martha Vickers (28. mai 1925–2. november 1971) var ein amerikansk skodespelar og fotomodell. Ho er best kjend i rolla som Carmen Sternwood i The Big Sleep frå 1946.

Martha Vickers var fødd som Martha MacVicar i Ann Arbor i Michigan. Ho byrja karrieren som fotomodell. I 1944 og 1945 var ho på omslaget til Yank, The Army Weekly.

Den første filmrolla hennar var ei lita, ukreditert rolle i Frankenstein Meets the Wolf Man (1943). Etter fleire slike småroller fekk ho større roller, til dømes som Carmen Sternwood, den yngre syster til hovudrollefiguren spelt av Lauren Bacall i The Big Sleep (1946). På 1950-talet spelte Vickers fjernsynsroller, til dømes som Sheila Hayes i ein Perry Mason-episode frå 1959, «The Case of the Jaded Joker». Dei siste to opptredenane hennar var i 1960, i The Rebel med Nick Adams.

Vickers var gift tre gonger: Med filmproducenten A.C. Lyles (1948-1949), skodespelaren Mickey Rooney (1949-1951) og skodespelaren Manuel Rojas (1954-1965). Ho hadde ein son med Rooney og to døtrer med Rojas.

Martha Vickers døydde av kreft 46 år gammal. Ho er gravlagd i Valhalla Memorial Park Cemetery i North Hollywood.