Hans O. Skurdal

Hans Olsson Skurdal (27. februar 1872–15. november 1952) var ein norsk skulestyrar og gardbrukar frå Sør-Fron som representerte Bondepartiet på Stortinget i tre, til dels fire, valperiodar i tida 1922 til 1933.

Skurdal var son til ein gardbrukar. Han var elev 1889-91 ved hagebruksavdelinga på Ås landbrukshøgskule og deretter 1891/92 ved veterinær- og landbrukshøgskolen i København. Sidan var han stipendiat i Tyskland for å lære meir om frukttre og plantedyrking. I tida 1894 til 1899 var han gartnar og lærar ved Kalnes landbruksskole i Tune i Østfold. Frå 1899 var han så styrar av Fritzøe planteskole i Brunlanes til 1920. Han fekk skøyte på slektsgarden i Sør-Fron i 1911, men flytta dit fyrst i 1920. Skurdal var også skribent og gav ut småskrifter om skog- og hagebruk.

Skurdal var medlem av Brunlanes heradsstyre 1916-20. Hausten 1921 vart han vald til stortingsmann frå Oppland og representerte valkrinsen og Bondepartiet i åra 1922-27. Valperioden 1928-30 måtte han nøye seg med vere 1. vararepresentant til Stortinget, men møtte fleire veker både i 1928 og 1929. Stortingsperioden 1931-33 var han tilbake på fast tingsete. Dei to fyrste tingperiodane, 1922-24 og 1925-27, var han sekretær i Næringskomiteen. Valbolken 1931-33 var han sekretær i Lovkomiteen, dessutan odelstingspresident 1932-33.

• Stortingsbiografi Arkivert 2016-03-08 ved Wayback Machine.