Spaensche subjectie, bedwongen om heure persoonen ende alle heure macht te gebruycken om die te helpe t'onderbrenghen, dies niet meer de selue landen, die sy tot heure assistentie als vooren employeerde, verschoonende, dan oft se heur selfs vyanden waren geweest: latende de Spaengnaerden, onder 't decksel van gemutineert te zijne, ten aensien vanden grooten Commandeur in de stadt van Antwerpen gheweldichlick comen, daer ses weken lanck, tot laste vande Borgheren, nae henne discretie teeren ende daerenbouen tot betalinghe van heure geheyschte soldije, die selve Borgheren bedwinghende binnen middelen tijden (omme van het gheweldt vande selue Spaegnaerden ontslaghen te wesen) vier hondert duysent guldenen op te brenghen, hebbende daernaer de voorsz. Spaensche soldaten, meerder stouticheyt ghebruyckende, hen vervoordert de wapenen openbaerlick tegens het landt aen te nemen, meynende eerst de stadt van Bruessele inne te nemen ende in stede van d'ordinarise residentie van den Prince van den Lande, daer wesende, aldaer haren roofnest te houden, t'welck haer niet geluckende, hebben de stadt van Aelst overweldigt, daernaer de stadt van Maestricht ende de voorsz. stadt van Antwerpen gheweldichlick overvallen, ghesaccageert, ghepilleert, ghemoort, ghebrant en soo ghetrackteert, dat de tyrannichste ende crueelste vyanden van den lande niet meer oft argher en souden connen ghedoen, tot onuutsprekelicke schade niet alleenlick van de arme ingesetene, maer oock van meest van allen de Natien vander werelt, die aldaer hadden haer coopmanschap ende ghelt. Ende niettegenstaende dat de voorsz. Spaegnaerden byden Rade van State (byden welcken doen ter tijt mits de doot vanden voorsz. groote Commandeur geschiet, het gouvernement vande Lande was uut laste ende commissie van den voorsz. Coninck van Spaegnien aenveert) ten by zijne van Hieronomo de Rhoda, om heur overlast, fortse ende ghewelt, t'welck sy deden, verclaert ende gecondicht waren voor vyanden vanden Lande, heeft denselven Rhoda uut sijne authoriteyt (oft, soo't te presumeren is, uut krachte van seker secrete Instructie die hy van Spaegnien hebben mochte) aengenomen hooft te wesen vande voorsz. Spaegnaerden ende heure adherenten: ende (sonder aensien vanden voorsz. Raet van Staten) te gebruycken den naem ende authoriteyt van den Coninck, te contrefeyten sijnen zegel, hem openbaerlick te dragen als Gouverneur ende Lieutenant van den Coninck, waer deur de Staten zijn geoorsaect gheweest ten seluen tijde met mijnen voorsz. Heere den Prince en de Staten van Hollant en Zeelant t'accorderen: welck accoordt by den voorsz. Raede van State, als wettighe Gouverneurs van den lande, is geapprobeert en goetgevonden geweest, om gelijkerhant ende eendrachtelick de Spaegnaerden, des ghemeyne landts vyanden, te moghen aenvechten en uut den lande verdrijuen, niet latende nochtans, als goede ondersaten, binnen middelen tijden by diuersche ootmoedighe remonstrancien neffens den voorsz. Coninck van Spaegnien, met alder vlijt ende alle bequame middelen moghelick wesende, te vervolghen en bidden, dat den Coninck ooge ende regardt nemende op de troublen ende inconvenienten dier alreede in dese Landen gheschiedt waren ende noch apparentelick stonden te geschieden, soude willen de Spaegnaerden doen vertrecken uuten Lande, en straffen de ghene die oorsake gheweest hadden van het saccagheren ende bederuen van zijne principale steden, en andere onuutsprekelicke ouerlasten die sijne
