Verkehrstelematik

Verkehrstelematik (internatschonal ok Intelligent Transport Systems (ITS) is de Bruuk un dat Anwennen vun Telematik för den Verkehr. Verkehrstelematik hett to doon mit jede Aart vun Fohrtüüge, mit de Lüde, de dor in sünd, mit de Göder, de dor in losschickt un annahmen weert un mit dat Bearbeiden un Dorstellen vun Daten in en Fohrtüüg. De Verkehrstelematik hölpt dor to, den Stratenverkehr, den Spoorwegverkehr, den Seeverkehr un den Luftverkehr to koordineern. In en Definitschoon heet dat: Verkehrstelematik (ITS) meent dat Togriepen up un dat Tostüern, Bearbeiden un Bruken vun Daten, de mit den Verkehr to kriegen hefft, üm dor Informatschoon över den Verkehr to kriegen un em up'e Reeg to bringen un to stüern. Dor weert Technologien in de Twiege Informatschoon un Kommunikatschoon bi bruukt.^[1]

De Verkehrspolitik luert dor up, datt de Verkehrstelematik hölpen kann, de Probleme vun den Verkehr vun'n Disch to kriegen. De ganze Verkehr schall dor effizienter, ökologischer un ok sekerer mit afwickelt weern. De Infrastruktur, de al dor is, schall beter bruukt weern un all, de in'n Verkehr unnerwegens sünd, schöllt mit Hölp vun de Verkehrstelematik rundum Bescheed kriegen över allens, wat jem unnerwegens angeiht. So schall de Verkehr akraat un seker stüert weern.

In den Twieg vun de Logistik hölpt de Verkehrstelematik dorto, datt de ganze Transport beter plaant un dörföhrt weern kann.

Na eene Studie vun den ADAC steiht de Autofohrer in'n Döörsnitt bi 65 Stunnen in'n Stau. Dor weert um un bi 14 Milliarden Liter Kraftstoff bi verbruukt un schaadt so de Umwelt un kost veel Geld. Dör den Insatz vun Telematik könnt de Verkehrswege veel beter utnützt weern. Jedeen Autofohrer kann bitieds un aktuell, t.B. över sien Navigatschoonssystem, kunnig maakt weern, wo dat Staus gifft un wie he dor an'n Besten umto fohren kann.

1. ↑ Intelligente Transportsytem, in: Japans Zukunftsindustrien, Springer Verlag 2007, Andreas Moerke und Anja Walke