Thorbjörn Fälldin

Nils Olof Thorbjörn Fälldin (* 24. April 1926 in Högsjö; † 23. Juli 2016 in Ramvik^[1])) weer en sweedsch Politiker, de 1976-78 un 1979-82 Ministerpräsident vun Sweden weer.

De norrlännsche Buer Fälldin is vun 1971 an Parteivörsitter vun de agraarsch orienteerten Centerpartiet wesen. Bi de Rieksdagswahlen 1976 is Fälldin as eerste nich-sozialistische Politiker siet veertig Johren to’n sweedschen Ministerpräsident wählt worrn. He harr dat Regeer över en Koalitschoon ut siene Centerpartiet, de Folkpartiet liberalerna un de konservative Moderata Samlingspartiet. Disse Koalitschoon is aver 1978 tweibroken, vun wegen dat man sik nich eenig warrn künn in de Fraag üm den Bruuk vun Karnenergie – Fälldin sülvst weer en utmaakten Gegner vun de Atomkraft.

Bi de Wahlen 1979 hebbt de börgerlichen Parteien noch eenmol de Mehrheit kregen. Ofschoonst aver nu de Moderaten de Mehrheit harrn an Steed vun Centerpartiet, is Fälldin liekers as Ministerpräsident wedderwählt worrn. De Koalitschoon bestünn blots ut de beiden Parteien. Jüst as de eerste Koalitschoon is ok disse na twee Johren ut’neen gahn. Ditmol wegen ’n Striet üm de Stüerpolitik. Dorna is ünner de Parteien nochmol verhannelt worrn un Fälldin kreeg den Opdrag, en Minnerheitsregeeren ut sien egen Patei un de Folkpartiet liberalerna to billn, de vun de Modarata parlementaarsch tolereert worrn is. De hebbt denn bit to de Rieksdagwahlen 1982 regeert.

As de Partei bi de Rieksdagswahl 1985 noch mehr Stimmen verloren harr, is Fälldin vun’n Parteivörsitt torüchtreeden.

1. ↑ Thorbjörn Fälldin har avlidit. Sveriges Radio, 24. Juli 2016, fropen an' 1. Oktober 2016 (sweedsch).