Tex Beneke
.jpg)
Fotografie vun William P. Gottlieb.
Gordon Lee „Tex“ Beneke (* 12. Februar 1914 in Fort Worth, Texas; † 30. Mai 2000 in Costa Mesa, Kalifornien) weer en US-amerikaansch Jazzsaxophonist un Singer, bekannt as Liddmaat vun de Glenn Miller-Bigband un nah de sien Dood Baas vun eegen Bands, de Millers Musik pleegt hebbt.
Leven un Wark
[ännern | Bornkood ännern]Van 1935 bit 1937 speel he mit dat Orchester vun Ben Young un af 1938 in de Bigband vun Glenn Miller, wo he en vun de bekanntst Solisten weer un ok as Singer uptreden is („Chattanooga Choo Choo“, „I’ve got a girl in Kalamazoo“). He speel mit dat Glenn Miller Orchester in de Films „Sun Valley Serenade“ (1941) un „Orchestra Wives“ (1942) mit. As Glenn Miller 1942 sien Band uplösen dee, um mit sien Army Air Force-Band wieder to maken, speel he eerst bi Horace Heidt un Jan Savitt un leit dornah bit 1945 en Navy Band in Oklahoma. 1946 hett hüm de Wittfru vun Glenn Miller beeden, de Leitung vun de wiederhenn bannig fraagt Band to övernehmen (mit 19 Musiker un bit 1948 ok en tosätzlich Strieker-Sektion), wobi he ok nee Arrangements t. B. vun Henry Mancini speel un sogor Bebop-Inflooten bruukt hett. Wiel hüm aber de strikten Anweisungen vun de Miller-Arven (un vun RCA Victor) in Bezug up de Musik nich in’ Kraam passen deen, hebbt se sück 1950 in’ Striet trennt. So hett man ok dorför sörgt, dat he nich in de Hollywood-Speelfilm The Glenn Miller Story (1954) mitmaken kunn. Beneke hett dornah en eegen Orchester grünnd, mit dat he Glenn Millers Musik oder Musik in de Stil vun Glenn Miller speel. 1951 speel dor ok Bob Brookmeyer as Pianist mit. Beneke speel ok in de 1960er Johren mit verscheeden Glenn Miller Reunions (t. B. mit de ehmalgen Miller-Singers Ray Eberle un Paula Kelly) un af un an ok in Disneyland. Mit en nee Orchester is he van de 1970er Johren bit in de 1990er Johren uptreden. Midden vun de 1990er Johren harr he en Slaganfall un speel dornah kien Saxophon mehr, weer aber wiederhenn Bandleader un Singer.
1996 wurr he in de Big Band and Jazz Hall of Fame upnommen. He is 2000 an sien Wahnoort Costa Mesa storven.