Parlbarg (Landkreis Stood)

Wapen/Flagg	Koort
Basisdaten
Bundsland: Neddersassen Landkreis: Stood Gemeen: Stood
Inwahners:
Postleettall:	21684
Vörwahl:	04141
Geograafsche Laag:	Koordinaten:53° 36′ N, 9° 26′ O53° 36′ N, 9° 26′ O

Parlbarg (hoochdüütsch Perlberg) is en lütten Oort, de to Wiepenkathen tohöört, in de Gemeen Stood in’n Landkreis Stood, Neddersassen. Dat liggt an dat linke Över von de Swing, so bi 500 Meter af von’n Stroom.

De Naveröörd sünd Hahl in’n Noorden, Stood in’n Noordoosten, Barg, Lütt un Groot Thun in’n Süüdoosten, Wiepenkathen in’n Süüdwesten un Haddörp in’n Noordwesten.

Bi Parlbarg is von de Midd von dat 19. Johrhunnert af an en Grafffeld mit Urnengräver ut de Völkerwannertied opgraavt worrn. Later hebbt se bi en Graavakschoon 1936 500 Urnengräver funnen un 1949 noch wedder 400 Brandgräver. Na de Buckelurnen, de se dor funnen hebbt, hebbt se de Parlbarg-Grupp defineert, de en Reeg Grafffeller tohoopfött, de ähnlich utstatt sünd.

Parlbarg dükert 1204 toeerst in de Oorkunnen op, as Hinnerk V. den Oort tohoop mit Wiepenkathen un Haddörp an dat Klooster St. Marien schenkt hett.

1894 hebbt se bi dat Graven von en Sood en Graff ut de Tied üm 400 n. Chr. funnen. Dat Graff leeg so twee Meter ünner de Eer. In dat Graff hebbt se en Holtammel mit Bronzbannen funnen, en Deel von en Bronzfatt, Resten von en Liefreem-Garnitur ut Bronz, en Stüttarmfibel un en konisch Glasbeker.

Parlbarg höört von öllers al to Wiepenkathen mit to un weer keen egen Gemeen. Mit de Gemeenreform in Neddersassen an’n 1. Juli 1972 is Parlbarg tohoop mit Wiepenkathen Deel von de Gemeen Stood worrn.

Vör 1859 weer Parlbarg Deel von dat Amt Stood un denn von 1859 bet 1885 to dat Amt Himmelpoorten. 1885 is de Oort denn Deel von’n Kreis Stood worrn un 1932 von’n ne’en, grötteren Kreis Stood.

Parlbarg is evangeelsch-luthersch präägt un höört to de Karkengemeen von de Markus-Kark in Hahl. Vördem de Karkengemeen 1965 grünnt worrn is, hett Parlbarg to dat Kaspel von de Cosmae-Kark in Stood tohöört.

Parlbarg liggt an en Blangenstraat von de Bundsstraat 74, de in’n Noordoosten an de Bundsstraat 73 ran löppt un na Stood geiht un in’n Süüdwesten dör Wiepenkathen na Hogenoh un Öölm geiht.

De nächste Bahnhoff is de Bahnhoff Stood an de Nedderelvbahn.

1. ↑ C. H. Jansen: Statistisches Handbuch des Königreichs Hannover. 1824, Sied 484: http://books.google.de/books?id=tG0AAAAAcAAJ&pg=PA484
2. ↑ Friedrich W. Harseim, C. Schlüter: Statistisches Handbuch für das Königreich Hannover. 1848, Sied 139: http://books.google.de/books?id=eOI-AAAAcAAJ&pg=PA139
3. ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 143: https://books.google.de/books?id=qTZDAQAAMAAJ&pg=RA2-PA143