Margot Werner

Margot Werner (* 8. Dezember 1937 in Soltborg; † 1. Juli 2012 in München^[1]) weer en öösterrieksche Ballettdansersche un Chansonsingersche.

Werner is as Dochter vun en Koopmann un en Pianistin in Soltborg opwossen un hett dor an’t Realgymnasium bi de Ursulinen de middlere Reife afleggt. To ehrn Danskollegen Heinz Bosl harr se en drangen Betog. Ehr eerste Eh weer mit den Schauspeler Peter Pasetti. Siet 1978 weer se denn mit den Koopmann Jochen Litt in de Eh, de en Hotel in Tirol harr, dat se bit to’n Konkurs in’t Johr 2005 finanziell ünnerstütt hett.^[2]

Margot Werner hett in’t Öller vun dree Johren al eersten Ballettünnerricht kregen. An’t Soltborger Landstheater un bi Friderica Derra de Moroda hett se en klass’sche Dansutbilln maakt, un weer denn mit söventeihn Johren an’t Bayerische Staatsballett anstellt. In dree Johren is se dor to en Vördansersche opstegen. Vun 1959 an weer se Solistin un hett ünner annern tosamenarbeit mit Choreografen as John Cranko un John Neumeier. Bit 1975 is se faken mit Heinz Bosl optreden. As de doodbleven weer, hett se sik tosamen mit Konstanze Vernon för de Heinz-Bosl-Stiftung insett.

De Kompnist Bert Grund hett 1972 dree Leder för Margot Werner komponeert, mit de se en ne’e Loopbahn anfungen hett. Bannig ünnerstütt worrn is se dorbi ok vun Abi Ofarim. In dat glieke Johr hett se in’n Wiener Konzerthuussaal mit Peter Kreuder sungen. Dorna harr se egene Feernsehshow mit den Titel Von Margot bis Montag ünner den Speelbaas Peter Hajek woneem ünner annern Heinz Bosl un Klaus Kinski to Gast weern. Wieter is se in’t Speelcasino vun Travemünn optreden un harr vun November 1973 bit März 1974 en Gastspeel bi de Münchner Lach- und Schießgesellschaft. Vun 1975 weer Werner in tallriek Feernsehshows as Dansersche, Singersche un Entertainersche to sehn, to’n Bispeel in Sennen as Feuerabend mit Hans-Joachim Kulenkampff, Dalli Dalli oder Am laufenden Band.

Mit eher Programm Wasser, Feuer, Luft und Erde güng se 1976 op Düütschland-Tournee, un hett later noch wietere Tourneen maakt. Een vun ehr gröttsten Hits weer 1977 dat Leed So ein Mann. Mit ehrn musikaalschen Begleider Max Greger Jr. harr se vele Optreden in’t In- un Utland. Vun 1986 an is se meist jeed Johr in’t Renitenztheater in Stuttgart to sehn wesen. En wieteren Hööchpunkt vun ehr Loopbahn as Entertainersche weer de Optritt bi’n Metropolitan Opera Ball vun New York. Mit Movie Classics hett se 1994 Spood in de Münchner Philharmonie un in de Stuttgarter Lederhall fiert.

As Schauspelersche hett Werner toeerst in Bertolt Brecht sien Dreigroschenoper op de Bühne stahn. Dat weer in’t Münchener Residenztheater. Wieter hett se ok in en Reeg vun Feernsehprodukschonen mitspeelt as Lieb Vaterland, magst ruhig sein na den Roman vun Johannes Mario Simmel, in de Operette Im weißen Rößl am Wolfgangsee mit Helmuth Lohner oder in de Feernsehreeg Liebt diese Erde.

Margot Werner is an’n 1. Juli 2012 doodbleven, nadem se ut’n drüdden Stock vun en Müncher Krankenhuus stört is.^[3] Ehr Asch is op’n Kommunalkarkhoff in Soltborg bisett worrn.

• 1974: Und für jeden kommt der Tag
• 1976: Wasser, Feuer, Luft und Erde
• 1977: Nur eine Frau
• 1978: Ich hab im Leben nichts bereut
• 1980: Häng dich bei mir ein
• 1983: …denn ich bin ich
• 1985: Traumflüge
• Lieder mit… Margot Werner
• Stargala / Margot Werner
• Margot Werner in Gold
• Meine größten Erfolge

• …und für jeden kommt der Tag. (Autobiografie) Herbig, München 1982, ISBN 3-7766-1196-0.
  • Traumflüge. Vom Ballett zum Gesang. „dörkeken“ Neeoplaag ünner ne’en Titel, Herbig, München 1986, ISBN 3-7766-1396-3.
  • Traumflüge. Vom Balett zum Gesang., Lizenzutgaav, Ullstein, Frankfort an’n Main / Berlin 1988, ISBN 3-548-20967-X.

• 1974: Swabinger Kunstpries
• 1975: Goldene Europa as intressanteste Neeopdecken vun’t Johr
• Trude-Hesterberg-Ring

1. ↑ Stern.de: „Sängerin und Tänzerin Margot Werner gestorben“, afropen an’n 3. Juli 2012
2. ↑ Manuel Brug: Das tragische Ende des Showstars Margot Werner. In: Welt Online, 3. Juli 2012.
3. ↑ Letzte Verbeugung In: taz.de vun’n 3. Juli 2012

• Offizielle Websteed
• Margot Werner in de Internet Movie Database (engelsch)
• Literatur vun un över Margot Werner in’n Katalog vun de Düütschen Natschonalbökeree
• Margot Werner in’t Austriaforum