Jiu Jitsu
Jiu Jitsu (japaansch 柔術 Jūjutsu) is en japaansche Kampkunst, de ehrn Beginn sacht in dat 17. Johrhunnert in Japan hett. Dat weer dat, wat de Samurai anwennt hebbt, wenn se keen Wapen mehr hebbt hatt un sik liekers gegen een ahn oder ok mit Wapen wehren müssen. As ok in dat Aikido (dat ja vun en Jiu-Jitsu-Wies kummt) warrt de Kraft vun de Gegenslüüd ehr wiederstüert as ophollen, sodat nich so veel egene Kraft bruukt warrt. De Naam sett sik tosammen ut de Wörr japaansch 柔 jiu „week“ oder „nageven“ und japaansch 術 jitsu „Technik“ un is de sülbige Naam as vun dat Ju Jutsu, bloot dat dat keen japaansch Begrepen mehr hett. (De Europäschen kunnen de japaanschen Naam nich lesen un so is dat to twee verscheden Wörr worrn.)
Jiu Jitsu is bannig mannigfolig un dat gifft neven dat Wiederstüern vun de Kraft ok Treed, Slääg, Smeet, Hevels, Wörgers un de Kamp an‘n Bodden. Een finnt wat ut den Judo jüstso in dat Jiu Jitsu wedder as wat ut den Karate oder Aikido un dat geiht ok dorüm, sik gegen Stöcker un Messen un Ümklammern un Hoor trecken to wehren. Ganz wichtig is dorbi dat wi nicht mit Kanonen op Spatzen/Lünken scheten un uns Gegenmann oder -fru nich glieks bi allem so doll slaan, dat he oder se in dat Krankenhuus mutt. Dat europääsche Jiu Jitsu vun vundaag is en „apen System“ dat ut all Oorten vun Kampsport Saken övernimmt, wenn se denn goot funktioneern doot.
Ehr de Kampkunst in Japan to dat Jiu Jitsu worrn is, weer dat Kung Fu un dat kummt ut China un ist de ole Kampkunst vun de Shaolin-Mönken. Wo dat nu aver Jiu Jitsu worrn is, dor gifft dat twee Vertellen to. De een is, dat een vun de Chinesen dat Weten vun dat Kung Fu an dree Samurai verköfft hett, de ehr Sweerter nich mehr dregen dörven. In Japan hett de Regeeren nämli 1603 na den langen Börgerkrieg verbaden, dat de Samurai ehr Sweerter wedder dreegt. De tweede Vertellen is dat en japaansch Dokter sehn hebben schall, wo en Wichel sik in den Storm böögt hett un dorüm anners as de annern Bööm nich twei gahn is. (De tweede Verschoon vun de tweede Vertellen is, dat dor keen Storm weer, sünnern dat Winter weer un de starren Äst vun den annern Bööm ünner den Snee braken sünd.) De Dokter harr in China den Tweekamp ahn Wapen lehrt un hett nu den Infall hatt, dat een dörch nachgeven winnen kunn. Laterhen is dat to‘n Enen dordörch, dat de Kaiser Willhelm II. dor ganz hen und weg vun weer, as em dat bi en Besöök vun de Japaners in Kiel wiest worrn is, un to‘n Annern dörch Erich Rahn denn na Düütschland kamen. Erich Rahn is dor wichtig för, wiel dat he den Zirkuskämper Katsukuma Higashi besnackt hett, dat de em siene Kamptechnik (Jiu Jitsu) bibröcht hett. Rahn is denn sülvst en Zirkuskämper west un hett dat ok bi de Polizei un de Militär ünnerricht.
Bi dat Öven driggt een en Antog ut en Gi (en Jack), en Büx un en Gördel. De Gördel kann as en Judo verschedene Klöören hebben, de dorvun afhangen doot, wo veele Pröven een al maakt hett. De Reeg is witt, geel, oranj, gröön, blau, bruun un denn swatt. För de Kinner gifft da noch de Twischenklören witt-geel, geel-oranj un oranj-gröön. Normalerwies is een bi dat Öven in dat Dojo (en Sporthall) un dor gifft dat en paar Regeln för dat Bedregen. As Wapen warrt Messen, Stöcker, lang Stöcker un af un an ok Pistolennamaaks bruukt.
Weblinks
[ännern | Bornkood ännern]
Wiktionary: Jiu Jitsu – Bedüdensverklaren, Woortherkamen, Synonymen, Översetten