Eenfachen Dintenfisch
| Eenfachen oder slichten Dintenfisch;
Eenfachen Enktfisk, Sepia | ||||||||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|
.jpg) | ||||||||||||||||||||||||
| Systematik | ||||||||||||||||||||||||
| ||||||||||||||||||||||||
| Wetenschoplich Naam | ||||||||||||||||||||||||
| Sepia officinalis | ||||||||||||||||||||||||
| Linnaeus, 1758 |
De Eenfache oder Slichte Dintenfisch oder Enktfisk (Sepia officinalis), ok eenfach Sepia nömmt, is en Aart mank de Teinarm-Dintenfische. As all Dintenfische höört he to de Koppfööt mit to. He is tohuse an de Küsten vun Westeuropa, Noordafrika, in de Middellannsche See un in de Noordsee. De Eeenfache Dintenfisch warrt bit hen to 49 cm lang un bringt bit hen to 4 kg up'e Waag.
Dat Lief
[ännern | Bornkood ännern]Acht Arms sitt um den Mund umto, twee annere sünd versteken in Taschen vun sien Mantel. Dat sünd de Tentakels. Se kaamt eerst rut, wenn de Dintenfisch Büte griepen will. Hett he ehr mit de Fangarms tofaat, geevt se de Büte fudder an de körteren Arms. De eenfache Dintenfisch hett Linsenogen un kann dor meist so goot mit kieken, as de Warveldeerter dat mit ehre Ogen ok könnt. Wenn he sik versteken will, kann de eenfache Dintenfisch siene Farv ännern. Dat maakt he mit de Zellen vun siene Huud, wo de allerhand Farvpigmente dör Muskelfasern ut'neentrocken weern köönnt. So kaamt allerhand Farven tostanne.
Wie de eenfache Dintenfisch siene Büte fangt
[ännern | Bornkood ännern]Bi den eenfachen Dintenfisch gifft dat twee Aarden, wie he siene Büte fangt. Eenmol bruukt he dor siene Tentakels for, un dat annere mol jumpt he los un grippt sik de Büte. Wie he dat maakt, dat hangt dor vun af, wie groot un vun wat for'n Aart siene Büte is. De Tentakels bruukt he bloß man bi lüttjere Kreefte, Granaat, Krabben oder Fisch. Dor stellt he sik eerst mol so hen, datt he de Büte good sehn kann. Denn sprett he de korten Arms na de Sieten hen af un de langen Fangarms kaamt rut. He tööft kort af un denn schutt he mit siene beiden langen Tentakels up de Büte to un hollt ehr fast. Achternah grippt de eenfache Dintenfisch de Büte ok mit de annern Arms un sluukt de glieks dal. Jumpen deit he bi gröttere Krabben. Dor weert de beiden langen Tentakels nich bi insett. Se schöllt ok vun dat annere Deert nich verwunnt oder in'n Dutt maakt weern. Ok bi dat Jumpen stellt sik de Dintenfisch eerst mol so up, datt he de Büte good sehn kann, un jumpt dor denn up un kriggt ehr mit siene acht lüttjeren Arms tofaat. Achternah warrt de Schillen vun de Büte mit en Aart scharpen Snavel open maakt, de in de Sepia ehren Mund in sitten deit. En Nervengift lahmt dat Deert denn. Tolest warrt dat Binnerste vun de Büte dör Enzyme uplööst, de in den Dintenfisch sien Spee sitten doot. Dat kann bit hen to een Stunne duern.
Wo he vorkamen deit
[ännern | Bornkood ännern]De eenfache Dintenfisch leevt in ganz flacke Waters bit hen to en Deepde vun bi 200 m. Junge Deerter gaht nich deeper, as man bit 50 oder 80 m. Ehr Schulp, de mit Luft füllt is, kann högern Druck noch nich verdregen. Vorkamen deit he vun de nöördliche Noordsee (bit to'n 63. Graad nöördliche Breede; Gemarken an de Küst vun Süüdnorwegen) over de Westküsten vun de brittschen Eilannen, in de Middellannsche See un an de Küsten vun Westafrika (bit runner to'n 15. Graad nöördliche Breede). Düsse Aart fehlt in de süüdliche Noordsee (Oostküsten vun England, düütsche un nedderlannsche Küsten vun de Waddensee).
Literatur
[ännern | Bornkood ännern]- Patrizia Jereb, Clyde F. E. Roper: Cephalopods of the World - An Annotated and Illustrated Catalogue of Cephalopod Species Known to Date. Volume 1 Chambered Nautiluses and Sepioids (Nautilidae, Sepiidae, Sepiolidae, Sepiadariidae, Isiosepiidae and Spirulidae). FAO Species Catalogue for Fishery Purposes, No. 4, 1: 1-262, Rom 2005, ISBN 92-5-105383-9
Weblenken
[ännern | Bornkood ännern]
Eenfachen Dintenfisch. Mehr Biller, Videos oder Audiodateien to’t Thema gifft dat bi Wikimedia Commons.