Carl Heinrich Behrens-Nicolai

Carl Heinrich Behrens-Nicolai (* 13. Mai 1873 in Golzwarden; † 30. Oktober 1960 in Bremen) weer en Architekt in Bremen.

Behrens-Nicolai siene Öllern weern de Kaptein Johann Dietrich Behrens un Catherine Nicolai. Siene Kinnertiet hett he in Leh tobröcht. He besöch de Realschool in Geestemünn un hett vun 1893 af an in Hannober up Ingenieur studeert. Dorna güng dat na Darmstadt, wo he Hoochbo studeer. An'n 13. Februar 1901 hett he in Overhus Anna Maria Caroline Oehler heiraat. Mit ehr hett he ene Dochter harrt.

Siene eersten Arbeiden as Baas up’n Bo weer dat Restaureern vun ole Karken in dat Rhienland. 1902 keem he na Bremen. Behrens-Nicolai hett in Bremen dree Bowarken plaant un boot, de hüdigendags noch en besunnere Rull speelt: Dat weern de Centaurenaftheek in de Ööstliche Vörstadt in den Stil vun’n „Noorddüütschen Backsteenexpressionismus“, de Silo-Toorn vun de Rolandmöhl in’n Stadtdeel Habens (1925) un dat Koophuus „Bambüdel“ vun den jöödschen Ünnernehmer un Koopmann Julius Bamberger, dat he 1927 plaant un 1929/30 boot hett. Faken weer vunwegen den weken Unnergrund wichtig, dat he nich bloß Architekt, man ok Ingenieur weer. He hett ok noch allerhand annere Wohn- un Geschäftshüser boot. In latere Johren hett he tomeist Gootachten vun ganz verscheden Aart schreven. Bit to den Dag, an den he storven is, weer he as „Kunnigen unner Eed“ för Bremer Behörden un Gerichten togange. Ok buten Bremen hefft se em geern as böversten Gootachter för sik arbeiden laten. 16 Johr lang weer he Vörsitter vun den „Bund vun Düütsche Architekten in Bremen“. Bavenhen weer he ok lange Johren Vörsitter vun den ADAC in Bremen. An’n 8. Juli 1958 hett he vun’n Bundspräsidenten dat Verdeenstkrüüz vun’n Verdeenstorden kregen.