Hygromeater

Een hygromeater is een apparaot um de vöchtigheid in in bi'jveurbield de lucht met of te meaten. De ienvoldigste vörm van een hygromeater besteet uut twie thermomeaters. Van iene van die twie thermomeaters wördt het böllechien van de thermomeater altied nat eholden. Disse thermomeater wördt deur het verdampen van het vocht of ekoeld töt het dauwpunt, de natteboltemperatuur. Deur de twie thermomeaters of te leazen ku-j met een tabel de vöchtigheid van de lucht ofleazen. Dit hiet ook wel een psychromeater.

Er bint ook zat andere hygromeaters. De miest gebruukte simpele (huus-tuun en keuken) hygromeaters gebruukt een haor van een dier of means die onder spanning stiet um zo de luchtvöchtigheid te meaten. Een naodiel van het gebruuk van haor is dät de lengte van haor niet lineair toenemp bi'j een toenemmende luchtvöchtigheid. Um zo de luchtvöchtigheid te weaten is er wier een tabel neudig um de lengte van het haor um te rekkenen naor de luchtvöchtigheid die daorbi'j heurt.

Ook ni'jmoedse (medärnere) hygromeaters die elektronisch bint wördt gebruukt. Disse thermomeaters määkt gebruuk van halfgeleiderkristallen waorvan de geleiding ofhangt van de luchtvöchtigheid.

Hygromeaters bint belangrieke in sauna's, musea en bruuikassen. Zie bint ook belangrieke in huzen waoras een hölten vloere of een piano in een goeie conditie mut blieven. Hier is het belangrieke um de luchtvöchtigheid in de gäten te holden.

Een hygrogrääf is een hygromeater die niet allenig noe, määr ook de luchtvöchtigheid van eers kan bi'jholden, bi'jveurbield op papier.

Een weerhuusien is een slim ienvoldig soort hygromeater met mangs ook een thermomeater er bi'j in.

• Rund 1500 hef Leonardo da Vinci de hygromeater uut evunden.
• In 1664 hef Francesco Folli een meer bruukbaere hygromeater emääkt.
• In 1783 hef Horace-Bénédict de Saussure de eerste hygromeater van een haor emääkt (haor-hygromeater).
• John Daniell määkte in 1820 de eerste dauwpunt-hygromeater.
• Robert Hooke wördt väke enuumd in combinaotsie met de hygromeater.

• 
  Precisiehygromeater in een bunker uut de Twiede Wereldoorlog
• 
  Ni'jmoedse (medärne) haor-hygromeater
• 
  Binnenkaante van een hygromeater veur binnen in huus

Dit artikel is eskreaven in et sallandsk.